Rs 3,00,000 sem ngei tum a ni ; Dan loa sumdawnna kan do - CM

Chief minister Zoramthanga chuan nimin khan Chief Minister's Office-ah thuthar thehdarhtute kâwmin, inthlan hmaa an intiam ang ngeiin Socio Economic Development Programme (SEDP) hnuaiah Rs 3,00,000 sem tlin an tum thu a sawi a, dan loa sumdawnna an do thu a sawi bawk.

CM Zoramthanga chuan, SEDP bul ṭanna atan chhungkaw 60,000 aia tlem lo hnenah Rs 50,000 zel sem phawt an tum thu sawiin, "Pawisa awm dan azirin chhungkaw 60,000 aia tam pawh kan pe thei mai thei. Chhungkaw 60,000 hnena sem tur hi chu pawisa kan neih sa a ni a, kan sem chhunzawm zel ang," a ti.

Vanglaini palai zawhna chhangin Zoramthanga chuan, inthlan hmaa an intiam ang ngeiin SEDP hnuaiah Rs 3,00,000 sem tlin an tum thu a sawi a, "A trade azirin cheng nuai thum aia tam pek ngaite pawh an awm ang," tiin, SEDP chu mipui khai chhuahna tura tih a nih thu a sawi.

Chief Minister sawi danin, SEDP kalpui ṭan tak tak tur a nih avangin CM kaihhruai SEDP Governing Board, Deputy Chief Minister kaihhruai SEDP Executive Board, DC-te kaihhruai District SEDP Committee leh Village SEDP Committee-te din thar a ni. Village SEDP Committee-a chairman leh member turte chu District SEDP Committee-in an ruat dawn.

Kuhva rah tawlh chungchanga zawhna chhangin Zoramthanga chuan, "Kuhva chauh ni lo, eng bungrua pawh dan loa lo lut chu tihbo kan tum. Ṭhál lai phei chuan Ṭiau aṭanga rawn luh theihna a tam si, theihtawp chhuah mah ila, lo lut tâwk a awm ṭhin. Thih huamin an rawn ti ve tawh ṭhin si. Nagaland leh Manipur-ahte pawh dan loin Myanmar aṭangin bungrua a lut ve reng a ni," a ti.

Chief Minister chuan, kuhva chu a lian tham a, kawngte a tihchhiat avangin a veiawm zual tih sawiin, "Kuhva chauh ni lo, thil dang pawh regularise (dan anga kaltir) turin sorkar laipui lamah ṭan kan la. Dan ang taka lâk luh an nih theih nan hma kan la a, Covid-19 a rawn léng zui si. Chu aia la pawi chu Myanmar a buai a, biak theih an ni rih si lo," a ti a; dan loa sumdawnna an do zel tur thu a sawi.