HCS-ah chhungkaw 40% vel inziak lut ; February 2021 chin bill an pe zo thawkhat

Mizoram State Health Care Scheme (MSHCS)-ah sorkar hnathawk nghet chhiar tel loin Mizorama chhungkaw awm zat aṭanga 40% vel an inziak lût a; damdawia inenkawlna senso (health care bill) zingah February 2021 chin an pe zo thawkhat tawh.

Health minister Dr R Lalthang­liana hoin nimin khan Secretariat conference hall-ah sorkar leh páwl aiawhte'n Health Care Scheme (HCS) an sawiho a; Minister chuan, MSHCS-a inziak lut tura mipui sáwmin, "Kan mamawh hun atan a pawimawh em em a, kan mamawh lo hlauh a nih pawhin mi dangte tana luan chhuahna a ni. Hun hawn laia inziah luh a pawimawh," a ti a, pawl hrang hrang leh district council aiawhte chu an member-te leh an chipuite zingah uar lehzuala tlangau turin a chah.

MSHCS hotute chuan, sorkar hnathawk nghette chhiar tel loin Mizorama chhungkaw awm zat aṭanga 40% vel MSHCS-ah an inziak luta an hriat thu an sawi a, "Health care bill táng pawh nikum February thla chin chu kan pe zo thawkhat tawh a, Covid-19 vanga sum harsatnain nasa takin a nghawng a ni," an ti.

Ṭhutkhawmah hian, MSHCS-a inziak lut an tam zawk theih dan tur leh mipuiin tun aia an ngaih pawimawh dan tur sawiho a ni. Pawl aiawhte chuan MSHCS pawimawhna mipui zirtirna tura sorkarin a ruahmante theihtawp chhuaha bawhzui an inhuam thu an sawi a; district council aiawhte pawhin an huam chhungah ngawrh taka awareness campaign neih an mamawh thu an sawi.

Mizoram sorkar hnathawk nghette medical reimbursement leh HCS chhûn fin chungchang chu uluk leh zau zawka sawiho leh ṭha an ti a; MSHCS online registration tih theih dan kawng zawn a ṭul thu an sawi bawk.

Ṭhutkhawmah hian Health & Family Welfare Board vice chairman Dr ZR Thiamsanga, Health secretary mawhphurhna la mektu Dr Lalzir­mawia Chhangte, HFW principal director Dr F Lallianhlira, Finance department leh MSHCS hotute bakah, Central YMA, MUP, MHIP, FMGEW, ACLCA, NGHAM, All Mizo­ram VC Association, CADC, LADC, MADC aiawhte an tel a ni.