KHAWTHLIR

Thisen pe
Champhai Bethel Branch YMA chuan February 1, Thawhlehni khan an din champha vawi 39-na pualin Bethel Presbyterian Kohhran Hall-ah thisen pek rûnpui an huaihawt a, Champhai District Hospital tan thisen unit 31 an pe a, petute mipa 26 leh hmeichhia panga an ni.

Sub-centre tlawh
MLA Dr Vanlalthlana chuan February 1, Thawhlehni khan a bial, Aizawl North-II huam chhunga health sub-centre awmte a tlawh kual a, kut tihfaina, hmai tuamna, oxygen leh personal protective equipment a pe. Sub-centre-a thawkte'n mamawh an thlente chu a theih chin chinah tihhlawhtlinsak a tum thu Dr Vanlalthlana chuan a sawi.

Minister hoin DTO-te thukhawm
Transport minister TJ Lalnuntluanga hoin nimin khan district transport officer-te'n an inrêlbàwlna atana an mamawh, harsatna leh hmasawnna turte an sawiho. Minister-in Aizawl leh district khawpuiah lirthei khalha hmangcháng leh hawihhâwmna chungchang inzirtirna buatsaih leh, chutiang lama inzirtirnate driving license pek chhuah dawna neih a rawtna chu tihhlawhtlin ni se, an ti.