Covid-19 vangin mi 615 thi tawh

Nimin khan tlai dar 5 thlengin Mizoramah Covid-19 vangin mi pahnih an thi a, February 1, Thawhlehni zan khan mi pakhat a thi bawk a, an vaiin natna dang nei tel an ni. Mizoramah hripui vangin mi 615 an thi tawh a, kumin February thla bikah mi panga an thi tawh.

February 1, Thawhlehni zan dar 11:05 khan Lalramdinpuii (30), Bawngkawn chu State Referral Hospital-ah hripui vangin a thi a; Covid-19 positive a ni tih February 1 vêk khan hmuh chhuah a ni a, SRH-ah dah luh nghal a ni.

Nimin zing dar 3:40 khan K Lalhmangaiha (54), Chaltlang chu SRH-ah a thi a, Covid-19 vei a ni tih January 22, 2022 khan hmuh chhuah niin, January 23, 2022 khan SRH-ah dah luh a ni. Rebecca Malsawmtluangi (34), Zemabawk pawh nimin zing dar 6 khan SRH-ah a thi a, Covid-19 positive a ni tih January 17, 2022 khan finfiah niin, SRH-ah enkawl nghal a ni.