January thlaah rakzu litre 7,808 man

Excise & Narcotics department (END) chuan kumin January thla chhung khan rakzu litre 7,808 leh sapzu ûm 1,634 an man.

END hian January 2022 chhung khan sapzu ûm puitling (ml. 750) 1,487 leh a chanve (ml. 375) ûm 147 an man a; rakzu litre 7,808 an man bakah, zu bil lai ṭín 2,795 an tichhia. Ruihhlo dang, heroin, methamphetamine, ganja leh damdawi eng emaw zat an man bawk a ni.

END hian nimin zing dar 9:30 khan Bawngkawn Sairang Road-ah heroin gram 165 (hâwng 13) leh a neitua puh Lalnunpuia @ Khuala (20) s/o Tindoliana, Tuithim, Tahan, Myanmar-a nia inchhál an man a; February 1, Thawhlehni tlai dar 3:30 khan Ṭhuampui, Aizawlah heroin gram 23 (hâwng 2) leh a neitua puh Lalmuansanga Guite (29) s/o Lalruatsanga, Champhai Dinthar Veng, tuna Ṭhuampuia khawsa nia inchhál an man bawk.

Excise & Narcotics enforcement-te chuan February 1, Thawhlehni khan Phunchawng leh a chhehvela dan loa zu siamna hmun 11 an luhchhuak a, zu bilh lai ṭín 1,710 leh rakzu litre 420 an tichhia a, zu siamna hmunte an tichhe nghal.

END chuan, Aizawl dai hnaia zu siamte'n lungphu châwl, kal leh thin ṭha lo leh natna dang dang a thlen awlsam bik tih tarlangin, in lo hram turin mi tin an ngen a ni.