President's Rule-a Mizoram dah tura hmalaknaah ZPM-in tel zui an tum lo

ZPM party chuan, BJP, Mizoram Pradesh huaihawta President’s Rule-a Mizoram dah tura sorkar laipuia hmalak leh Assembly session-a no confidence motion put luh chungchanga hmalaknaah tel zui an tum lo.

January 28, 2022 khan BJP bul tumin eptu party-te chu BJP pisaah an inhmu khawm a; Mizorama sorkarna chelh mekteah India danpui bawhchhiatna leh dan leh thupek kenkawh kawngah sorkar a hlawhchham avangin Mizoram chu President’s Rule-a dah a nih theihna turin hmalak an sawiho bakah, tun thlaa Assembly session awm turah sorkar rin tâwk lohna, no confidence motion put luh chungchang an sawiho a, mahni party-ah ṭheuh sawiho phawt turin an dah a ni.

Sawihona chungchang hi ZPM rorelna sang, Political Affairs Committee chuan nimin khan an party pisaah an ngaihtuah a; resolution siamin, “BJP, Mizoram Pradesh-in political party leh mi sawm bikte inrâwn khawm a buatsaihah kan party aiawh teltir ve a ni a, an thu leh hla ngun taka kan ngaihthlak hnuah tel zui ve tawh loh ni se kan ti,” an ti.

ZPM resolution chuan, “BJP, Mizoram Pradesh-in an thawhpui ngei MNF sorkar ring tâwk lo a, central sorkar chakna hmachhuana nam thlûk an tum hi kan sorkar ding lai hlawhchhamzia lantirnaah kan ngai,” an ti bawk.