Covid-19 vei hmuh tam ber ní a thleng leh

February 1, Thawhlehni khan Mizoramah Covid-19 vei mi 2,573 hmuh chhuah a ni a, Mizorama hmuh tam ber ní a ni. Nimin khan hripui vei dam tawh mi 1,918 chhuahtir an ni a, Covid-19 vei mi pahnih an thi.

Covid-19 vei Thawhlehnia hmuh tharte chu mipa 1,134 leh hmeichhia 1,439 an ni a; RT-PCR hmanga hmuh 680, TrueNAT hmanga hmuh 119, RAT hmanga hmuh 1,755 leh FIA hmanga hmuh 19 an ni. Positivity rate chu 27.90% a ni a, mi 2,573 zinga mi 1,325-in symptom neiin, 1,248-in an nei lo.

Thawhlehnia Covid-19 positive hmuh thar 2,573 hi Mizorama hmuh tam ber ní a ni leh a, a hmaa hmuh tam ber ní, January 31 khan mi 2,531 hmuh chhuah a ni. Mi sang hnih aia tam hmuh chhuah ni nga a awm tawh.

Aizawl district-a positivity rate chu 40.47% niin, a sànna ber district a ni a, district dang pasarihah pawh 10% chung lam a ni. Siaha, Saitual leh Khawzawl district-ah 10% a tling lo thung.

IPR tarlan danin, mamit district-a Zamuang khuaah Covid-19 positive mi 102 hmuh chhuah a ni a, Sercvhhip district-a Ramlaitui khuaah mi 80 hmuh a ni bawk.

Nimin tlai dar 5 thleng khan hripui vei dam tawh mi 1,918 chhuahtir an ni a; district tina chhuak zat chu - Aizawlah mi 1,125, Mamitah 199, Kolasib-ah 158, Saitualah 138, Lungleiah 131, Champhaiah 61, Serchhipah 42, Hnahthialah 28, Khawzawlah 19, Lawngtlaiah 13 leh Siahaah mi pali an ni.

IDSP record angin, Mizoramah Covid-19 vei 1,77,595 hmuh chhuah a ni tawh a, mipa 84,009 leh hmeichhia 93,586 an ni a, mipa aiin hmeichhia 9,577-in an tam zawk. Nimin tlai dar 5 thleng khan mi 1,63,560 (92.10%) chhuahtir an ni tawh a, mi 615 (0.35%) thi tawhin, enkawl mek mi 13,420 (7.55%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,77,595 chu mi 1,000 zelah hripui vei mi 161 an awm ang a ni a; mi 1,00,000 zela Covid-19 vangin mi 55 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. February 1, 2021 thlenga swab sample endik tawh 16,85,297 aṭanga RT-PCR hmanga endik zat percentage chu 20.66 a ni a, RAT hmanga endik zat chu 73.63% a tling.