MADC mamawh zat sum pe turin CM ngen

Minister of state Dr K Beichhua, Siaha bialtu MLA chuan tun hnai khan chief minister Zoramthanga hnenah lehkha thawnin, Mara Autonomous District Council (MADC) hnenah a mamawh zat dik tak an dil cheng nuai 1,750 pe turin a ngen.

Dr K Beichhua hian January 31, 2022 khan Chief Minister lehkha a thawn a; autonomous district council (ADC) pathumte’n sorkarah budget revised estimate an thehluh ṭheuh thu leh January 25, 2022-a Finance department sanction order hmanga pek an nih thu a tarlang.

Dr K Beichhua tarlan danin, Lai ADC-in budget revised estimate chu cheng nuai 4,200 a ni a, nuai 1,800 (42%) pek a ni. Chakma ADC-in cheng nuai 3,400 an dilah nuai 1,300 (38%) pek a ni a; MADC hnenah erawh chuan nuai 1,750 an dil aṭangin nuai 304 (17%) chiah pek a ni thung.

Revised estimated-a sum pek zat chu budget pumpui aṭangin LADC-ah 9.69% leh CADC-ah 12.60% a nih laiin, MADC-ah chuan 1.93% chauh a ni tih tarlangin Dr K Beichhua chuan, “MADC hian Covid-19 vanga Mizoram sorkar sum harsatna hrethiamin, inrenchem tak leh inthlahrung takin an mamawh zat chiah an rawn dil a ni. Chuvangin, MADC-in an mamawh zat dik tak a chuang a liam awm loa revised estimate an rawn dil nuai 1,750 hi pek ngei theih ni se ka lawm hle ang,” a ti.