Vairengte-Sairang inkar kawng zauh turah Zangnadawmna vangin hna la ṭan thei lo

Ministry of Road Transport & Highways (MoRTH) hmalaknaa NH-06 leh NH-306 (Vairengte leh Sairang inkar) kawngpui zauh hna thawh tur chu zangnadawmna tura tih a tam lutuk avangin hna ṭan theih a la ni lo. Hetih lai hian, zangnadawmna chungchang buaipui tura Mizoram sorkarin a ruat, competent authority for land acquisition (CALA), Kolasib Additional DC chuan thlai man a to lo thei lo niin a sawi.

NH-06 leh NH-306 zauh tur hian Aizawl thleng a huam dawn a, Vairengte leh Mualkhang inkar bik chu phase paliah ṭhen a ni. Phase pahnih pawm a ni tawh a, phase pahnih dang MoRTH-in an zir chiang mek. Mualkhang leh Aizawl inkar bik chu phase hnihah ṭhen a ni a, kawng zauhna tur (alignment) a tìra ruahman chu thlâk tum a nih avangin ram lâk tur tihfel a la ni lo.

CALA chuan Vairengte-North Chhimluang inkara zangnadawmna zat tur chu NHIDCL-ah a thehlut tawh a, Kawnpui leh a chhehvelah thlai man hlut zawng chhût (assesment) mek a ni.

Vanglaini palai zawhna chhangin NHIDCL hotute chuan, Vairengte-Chhimluang inkara zangnadawmna zat tura CALA-in a thehluh chu a tam lutuk avangin an pawm thei lo tih an sawi a, "Chief Secretary leh Kolasib DC hnenah zangnadawmna zat tur chhût ṭha leh turin kan thawn a, an rawn thehluh leh hunah kan headquarters-ah kan thawn leh ang," an ti.

NHIDCL hotute chuan, zangnadawmna a fel loh chuan hna ṭan theih a ni lo tih sawiin, "Mimal ram kan la dawn a, zangnadawmna an dawn phawt loh chuan hna thawh phal a ni lo," a ti a; zangnadawmna a fel veleh hna ṭan theih a nih tur thu an sawi.

Thu dawn danin, CALA-in Vairengte leh Chhimluang inkara kawng zauhna atana ram laka zangnadawmna ngai zat tur a thehluh chu cheng vbc. 220 vel a ni a; chutih laiin, NHIDCL-in an lo ruahman lawk chu cheng vbc. 150 vel a ni.

CALA chuan Vairengte leh a chhehvelah kuhva leh coconut an chìn nasat thu sawiin, "Zangnadawmna pek a nih dawna thlai man zat tur bithliah sa a awm a, kuhva rah leh coconut hi a man a sang a ni. An sawisel ber pawh thlai man tura tih a ni," a ti a, ram lâk tur manah sawisel an neih loh thu a sawi.

NHIDCL chuan consultancy ruaiin zangnadawmna atana ngai tur an chhûttir thu sawiin CALA chuan, "Consultancy firm-te hi a hmunah kal loin, zangnadawmna ngai zat tur an chhût. Chumi mil chuan NHIDCL chuan budget an siam a, mahse, a hmuna kala an thlai zat chhiar nen a inmil thei lo a ni," a ti.

Hetih lai hian, NHIDCL hnuaia contractor-te chuan Vairengte leh a chhehvelah hna thawk turin an khawlte an chhawp tawh a, zangnadawmna avangin hna an la ṭan thei lo thung.

Vairengte leh Sairang inkar kawng zauh hi hna ṭan aṭanga kum hnih chhunga zawh hman tura ruahman a ni. NHIDCL-in an chhût dan chuan, kawng zauh hna thawh zawh a nih hunah chuan kawng a zauh mai bakah, kawng awm mek aiin a tâwi zawk dawn a, chuvang chuan Aizawl leh Silchar inkar chu darkar thum vel chhunga thlen theih beisei a ni.