DC-in thlamuang taka awm turin ráltlânte a chah

Kolasib bawrhsap Dr H Lalthlangliana chuan nimin zing khan Myanmar aṭanga ráltlân Khamrang khuaa awmte a tlawh a, thlamuang taka awm tur leh dan leh hrai zâwm ṭha turin a chah.

Dr H Lalthlangliana chuan, Covid-19 vanga sorkar a chauh lai ni mah se, sorkarin a tih theih tâwkin a chhawmdawl zel dawn tih sawiin, "In ramah harsatna a thlen avanga manganga rawn tlan thla in ni tih kan hria a, thlamuang takin awm u la, amaherawhchu, in awmna khua inkaihhruaina te, sorkar dan leh hraite in zawm ṭha tur a ni," a ti.

Kolasib SP Vanlalfaka Ralte chuan, khawvel hmun hrang hrangah ráltlânte khawsak harsatna avang leh chhan hrang hrang vangin an zingah mipat hmeichhiatna te, naupang chunga hleilennate leh rûkrûkte a thleng fo tawh tih sawiin, "Hetiang harsatna hi in zingah a thlen loh nan fimkhur taka in nun a pawimawh dawn a ni," a ti a, khawtlang leh ram tana harsatna siam lo tur leh harsatna an neih chuan police hnena thlen turin a chah.

Kolasib DC hian DMR kaltlangin ráltlânte tan Khamrang khawtlang hruaitute hnenah buhfai ip 45 a pe a; Kolasib CMO office-in Covid-19 vaccine an pek nghal bakah, a thlawna inentirna an buatsaih a, thosi lèn leh damdawite an sem bawk.

Khamrangah hian October 2021 aṭang khan Myanmar ráltlân an lut ṭan a, tunah hian chhungkaw 18 vel awmin, mi 102 an awm mek a ni.