Sikul chei ṭhat leh sak ṭhatah a nih dan tura kalpui a tlem - MZP

MZP Gen.Hqrs hruaitute chuan, NABARD sum cheng nuai 3,500 pûk hmanga sikul eng emaw zat sak ṭhat leh chei ṭhatah a nih tur anga hna thawh a tlem thu sawiin, "Drawing leh sanction amount nena en mil phei chuan a lungawithlak loh hle," an ti.

Hetih lai hian, School Education minister Lalchhandama Ralte chuan hnathawh ṭha lote chu siamṭhat a nih tur thu MZP hruaitute a hrilh.

MZP hruaitute chuan nimin khan Aizawl Press Club-ah thuthar thehdarhtute an kâwm a; an president Lalnunmawia Pautu chuan, sikul 65 sak ṭhat nan leh sikul 107 thawm ṭhat nan cheng nuai 3,500 ruahman a nih thu sawiin, "He thil hi Mizoram, a bik takin zirna tihhmasawn kawnga Mizoram sorkar hmalakna ropui tak a ni a, MZP pawh kan lawm em em a ni. Chutih rual chuan, a nih dan tur ni phak si loin, tute'n emaw hlâwkna nasa tak an neihna hmanrua mai a ni ang tih kan hlau," a ti.

Lalnunmawia Pautu chuan, hnathawhin a nih dan tur ang a nih phak loh an hlauh thu sawiin, "MZP chuan theih ang angin a en zui bakah a zir chiang a, thil lawmawm tam tak awm bawk mah se, a nih tur ang ni pha lo leh siamṭhat ngai kan hmu nual. Sikul sak hna thawk tur hian consultancy firm pahnih - CB Engineering leh Allied Concern-te thlan an ni," a ti a; an zirchianna aṭangin a nihna tur ang taka kalpui a tlem tih an hmuh thu a sawi.

MZP President sawi danin, an zirchiannaah hian MZP Gen. Hqrs-in sikul 25 an tlawh a, headquarters, sub-headquarters leh branch aṭangin report 24 an dawn bakah, phone hmangin sikul 50 vel chanchin an zawt a ni.

Lalnunmawia chuan, hnathawhte a hmuna endik a nih hnu­ah pawh School Edu­cation department leh contractor-te'n project nihphung chiang taka an hrilh theih loh thu sawiin, "RTI Act hmangin document hrang hrang dil a ni a, hei hian kan hmalakna a tihmuan phah hlei. Hmun pakhat kan tlawhnaah chuan MZP hnenah eng mah hrilh lo tura tih an ni. Hengte hian kan rilru a tina tak zet a ni," a ti.

MZP hruaitute chuan, sikul sak leh thawm ṭhat chungchang chu February 2, 2022 khan School Education Minis­ter leh official-te nen an sawiho tawh tih sawiin, "Education Minister zahawm takin hna ṭha lote chu siamṭhat an tum thu leh siamṭhat a nih hma chuan bill pek an tum loh thu a sawi angin, siamṭhat a nih hnuah chauh bill pe turin kan ngen a ni," an ti a, en zui zel an tum thu an sawi.

A hma pawhin Edu­cation Minister an sawipui tawh thu sawiin, "Hmalakna nei se chuan thuthar thehdarhtute hmaa puanzar kher hi a ngai lo tur. Mahse, hmalakna a awm loh avangin tun dinhmun hi kan thleng a ni. Tunah hian engineer-te tirin a hmunah an en zui mek a, ṭha taka thawh a nih loh chuan ngawih bopui mai kan tum lo a, hmalakna a awm loh chuan kan kal zel dan tur kan ngaihtuah ang," an ti.