HTE Minister-in zirna-in pahnih a hawng

Higher & Technical Education minister Dr R Lalthangliana chuan nimin khan Rashtriya Uchchatar Shiksha Abhiyaan (RUSA) 2.0 hmalaknaa zirna-in sak thar pahnih a hawng. Minister chuan, Ministry of Human Resource Development (MHRD)-in RUSA a kalpui dan a muangchàn avangin duh anga kal chak theih a nih loh thu a sawi.

RUSA 2.0 hmalaknaa zirna-in hawnte chu - T Romana College tana cheng nuai 180 sênga sak administrative building leh Institute of Advanced Studies in Education (IASE) tana cheng nuai 100 sénga sak Educational Research & Resource Centre a ni.

T Romana College administrative building hawnnaah Dr R Lalthangliana chuan, T Romana College chu NAAC accreditation B grade a nihna chu duh tâwk mai lo turin a chah a; zirna-in changtlunna tel loin zirna ṭha leh chhuan tlak neih a harsat thu sawiin, "MHRD-in RUSA an kalpui dan a muangcháng a, kan thiam loh ni loin anmahni lamah zawk fel lo a awm avangin kawng ṭhenkhatah kan duh angin kan kal chak thei lo a ni," a ti.

IASE Educational Research & Resource Centre building hawnnaah HTE Minister chuan, IASE chu B.Ed., B.Ed. (Multi Mode), M.Ed., M.Phil leh Ph.D thlenga zirna a nih avangin an pawimawh tih thu a sawi a, "Zirtirtute'n naupang in zirtir kawngah in intuai hriam a ṭul. Ram chhung hmun danga zirlai dangte rual páwl pha leh el pha tura kan zirlaite buatsaih leh siam hi zirtirtute tan chona lian tak a ni," a ti. Minister hian IASE Nursery Teacher’s Training Centre a hawng nghal bawk.

T Romana College-ah hian zirlai 1,320 an awm mek a, IASE-ah zirlai 700 vel an awm mek a ni.