Covid-19 donaa task force mi thite Ràlna tur dilna 7 sorkarah a lut tawh

Mizoram sorkarin local task force (LTF) leh village task force (VTF) mi leh sa, an duty-na aṭanga Covid-19 káia thi zuite Rs 20,00,000-a a ràlna, LTF/VTF Covid-19 Ex-Gratia Lumpsum Compensation Scheme dilna pasarih lut tawhin pathum pawm a ni tawh a, pawisa pek an la awm lo.

January 15, 2022-a Health minister Dr R Lalthangliana hoa Secretariat conference hall-a sorkar leh pawl ṭhenkhat hruaitute'n Mizorama Covid-19 dinhmun an sawihonaah, Task Group on Insurance hnuaiah LTF/VTF zinga Covid-19 dona aṭanga hripui kaia thi zui ta mi pahnih ràlna tur Rs 20,00,000 ve ve pek chhuah a nih tawh thu leh mi dang pakhat ràlna tur buaipui mek a nih thu tarlan a ni.

Covid-19 Task Group on Insurance chairman Ramchuana, Finance (EA) additional secretary ni bawk chuan Vanglaini zawhna chhangin, zangnadawmna dilna pasarih an dawn tawh thu a sawi a, "Pasarih zinga pathum chu kan enfiah hnuah kan pawm tawh a, a dang pali chu document enfel ngai a la awm avangin kan la pawm rih lo," a ti a; scheme chu September 30, 2021 thleng huam tura tih ni mah se, sorkarin March 31, 2022 thleng a pawhsei thu a sawi.

Task Group-in dilna pathum an pawmte chu Disaster Management & Rehabilitation department-ah an thehlut a, DMR-in Treasury-ah thehlut lehin, Treasury-in an pawm chuan zangnadawmna dawngtu turte hnenah pek tur a ni.

Vanglaini zawhna chhángin DMR hotute chuan, Task Group aṭanga dilna an dawn zinga pahnih chu Treasury-ah an thehluh tawh thu an sawi a, "A pahnih hian Treasury-ah a la táng mek a, bill pakhat dang thehlut turin kan buaipui leh mek a, kan thehlut thuai ang," an ti a, Treasury aṭanga dilna pawm ala awm loh vangin zangnadawmna pawisa pek anla awm rih loh thu an sawi.

June 21, 2021 thleng khan Ex-Gratia Lumpsum Compensation Scheme-ah hian Aizawla LTF 83 aṭangin mi 4,273 leh VTF 740 aṭangin mi 21,467 an inziak lut a; June 21, 2021 hnu lama inziak lut turin Task Group phalna lak hmasak a ngai a ni.