A záwnin ni 3 chhung mi 2,000 chuang Covid-19 vei hmuh chhuah a ni tawh

Mizoram aṭanga Covid-19 swab sample endikin kum hnih a tlinna, February 2, Nilai­ni khan Mizoramah Covid-19 vei mi 2,145 hmuh chhuah a ni a, a záwna ni thum chhung mi sang hnih chuang hmuhna a ni. Nimin khan hripui vei dam tawh mi 1,887 chhuahtir an ni a, Covid-19 vei thi an awm lo.

February 2 kha Mizo­ram aṭanga Covid-19 swab sample endik ṭan champha kum hnihna a ni a, endik hmasak ber chu West Bengal-ah tih a ni. Kum hnih chhungin sample 16,92,662 endik a ni a, positive 1,79,740 hmuh niin, endik zat aṭanga positive zat chu 10.62% a ni.

Nilainia hripui vei hmuh tharte chu mipa 938 leh hmeichhia 1,207 an ni a; RT-PCR hmanga hmuh 507, TrueNAT hmanga hmuh 79, RAT hmanga hmuh 1,530 leh FIA hmanga hmuh 29 an ni. Positivity rate chu 29.12% a tling.

IPR tarlan danin, Nilainia swab sample endikna district 11 zinga district parukah positivi­ty rate 20% chung lam niin, district dang pathumah 10% chung lam a ni a; Siaha leh Saitual district-ah 10% a tling lo thung. Aizawl khawpui chhungah hripui vei mi 30 aia tam hmuhna veng 11 a awm a, hmuh tamna ber Mission Vengah 79 hmuh a ni.

Nimin tlai dar 5 thleng khan hripui vei dam tawh mi 1,887 chhuahtir an ni a; district tina chhuak zat chu - Aizawlah 1,371, Mamitah 119, Lunglei-ah 110, Saitualah 81, Serchhipah 77, Kolasib-ah 65, Hnahthialah 25, Lawngtlaiah 17, Khawzawlah 16, Siahaah panga leh Champhaiah pakhat an ni.

IDSP record angin, Mizoramah Covid-19 vei 1,79,740 hmuh chhuah a ni tawh a, mipa 84,947 leh hmeichhia 94,793 an ni a, mipa aiin hmeichhia 9,846-in an tam zawk. Nimin tlai dar 5 thleng khan mi 1,65,447 (92.05%) chhuahtir an ni tawh a, mi 617 (0.34%) thi tawhin, enkawl mek mi 13,676 (7.61%) an awm.

Kum 2011 chhiarpui aṭanga chhûtin, Mizo­rama Covid-19 vei hmuh tawh 1,79,740 chu mi 1,000 zelah hripui vei mi 164 an awm ang a ni a; mi 1,00,000 zela Covid-19 vangin mi 56 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. February 2, 2021 thlenga swab sample endik tawh 16,92,662 aṭanga RT-PCR hmanga endik zat percentage chu 20.67 a ni a, RAT hmanga endik zat chu 73.62% a tling.