Kawlphetha hman man tihsan rawtna Dodal turin MPYCC-in mipui an sáwm

Mizoram sorkarin kawlphe­tha hman man tihsanna tura rawtna a thlen chu dodal turin Mizoram Pradesh Youth Cong­ress Committee (MPYCC) chuan mipui an sáwm.

MPYCC hruaitute chuan kawlphetha hman man tihsan tum chungchangah nimin khan an president Dr Lalmalsawma Nghaka hoin Joint Electricity Regulatory Commission (JERC) for Manipur and Mizoram pisa an tlawh a, JERC assistant chief engineer H Thanṭhianga an kâwm.

Dr Lalmalsawma Nghaka chuan, nikum 2021 khan Mizoram sorkarin kawlphetha hman man 41.92%-a tihsan tumin JERC-ah a rawt a, mahse, JERC-in 20.68%-in a tisang ta zawk tih a sawi a, "Tunah kum chanve chauh a vei hnuin Mizoram sorkarin kawlphetha chhit man chu mipui kan harsat lai berin 20% laia tihsan a rawt leh a, he rawtna hi kan dodal dawn a, mipui thlàwpna pawh kan ngen nghal a ni," a ti.

Kawlphetha hman man tihsan tumna chu a sang hle nia sawiin Lalmalsawma chuan, "Tun hi sorkarin rawtna a siam dodalna thehluh theih hun lai a ni a, pawl hrang hrang leh mi ṭhahnemngaite JERC-a dodal­na thehlut turin ka sáwm a ni," a ti a; Covid-19 karah mipui­­ khawsak harsat lai a nih avangin kawlphetha hman man tihsan rawtna chu hnûk kîr turin Mizoram sorkar an phût tih a sawi.

MPYCC President sawi danin, Congress sorkar laiin power tariff uchuak taka tihsan a awm ngai lo a, kum 2015-16 ah 2%, kum 2016-17-ah 4.02%, kum 2017-18 ah 3.60%, kum 2018-19 ah 5.90%-a tihsan a ni.

H Thanṭhianga chuan, Mizo­ram sorkar aṭangin power tariff tihsan rawtna an dawn angin, dodalna (objection) neite tan February 20, 2022 thleng thehluh theih a nih thu a sawi.