Kum kal mekah sorkar hnathawk MR bill atan Rs. 14,51,17,330.99 hmang tawh
Mizoram sorkar chuan sorkar hnathawk medical re-imbursement (MR) bill atan kumin April-September chhung khan Rs. 14,51,17,330.99 a hmang tawh. Sorkarin sum renchem nan MR bill tihtlemna turin Mizoram State Health Care Society (MSHCS) hmangin hma a la a, kum hmasa aiin kuminah MR bill atan sum sên vbc. 40 velin a tlem phah an beisei.
MSHCS hotute sawi danin, April 1, 2018 aṭangin sorkar hnathawkte MR bill dan thar hman a ni a, tun thlenga sorkar hnathawkte'n MR atana MSHCS-a bill an thehluh zawng zawng chu Rs. 17,24,02,173.99 a ni.
Uluk taka enfiah hnuah Mizoram chhung leh páwna MR bill an pawm tawh zawng zawng chu Rs. 14,51,17,330.99 a nih laiin, Rs. 2,72,84,843 an hnâwl thung.
April-September 2018 chhunga MR bill dawn zawng zawng aṭanga an pawm tawh (claim approved)-ah hian Rs. 11,46,27,340.99 chu Mizoram chhunga inenkawlte senso a ni a, phai lama inenkawlte senso chu Rs. 3,04,89,990 a ni.
MSHCS hotute chuan, April-September 2018 chhungin MR bill atan cheng vbc. 14 chuang an pek chhuah tawh bakah, file tawh lut la tih fel loh nen cheng vbc. 20 vel a nih an ring. Sorkar kum kal laiah thla ruk dang October 2018 - March 2019 chhunga sorkar hnathawk MR bill-a pek leh tur an beisei nen kum 2018-19 financial year chhungin cheng vbc. 40-50 vel sêng turah an inngai.
Kum hmasa lamah chuan MR bill atan cheng vbc. 80-90 vel sen ṭhin a ni a; kum 2016-17 khan cheng vbc. 78.09 chuang an sêng a, kum 2017-18 chhhung atan budget-ah cheng vbc. 98.51 dah a ni.
MSHCS hotute chuan, sorkar hnathawkte'n MR bill dáwna lehkha an tihfel chungchangah hma an sawn hle a, bill dik lo hulhual ang chi a awm tawh mang lo tih an sawi a, "A hmaa damdawi-in pakhata bill lem siamtu thawktu pakhat chu man chhuah a nih hnuah damdawi-in thuneitute'n an chawlhtir nghal," an ti.
MSHCS hotute chuan, sorkar hnathawk ṭhenkhatin an fate ni lo, an fate anga an ziah a awm ṭhin thu sawiin, "Mi dangin a dik lo tih an rawn sawi avangin kan hre chhuak a, kan siamṭha leh ṭhin," an ti.
MR bill chungchangah mimal file bawhzui ngai lo turin thawktute an ṭang hle nia sawiin, "Thil chincháng rawn zawtte hi kan hnar ngawt thiang lo a, mahse, mimal bill bawhzuitute'n min nawr nasatin hna kal laiah kan buai zual phah ṭhin," an ti bawk.
April-September, 2018 chhunga MR bill
# Title Re-imbursement Refer Re-imbursement Total
1. Bill thehlut zat Rs. 13,72,14,529.99 Rs. 3,51,87,644.00 Rs. 17,24,02,173.99
2. Bill pawm zat Rs. 11,46,27,340.99 Rs. 3,04,89,990.00 Rs. 14,51,17,330.99
3. Paih ṭhensak zat Rs. 2,25,87,189.00 Rs. 46,97,654.00 Rs. 2,72,84,843.00