MYC-in ALS hnenah cheng nuai 159.3 hlan

Mizoram ṭhalaite competitive exam leh technical entrance exam hmachhawn tura inbuat­saih atana coaching an kalna turin, Mizoram Youth Commission (MYC) chairman Joseph Lal­himpuia chuan Sep­tember 28, Zirtawpni khan Alternative Lear­ning System (ALS), New Delhi hnenah Rs. 1,59,30,000 a hlan.

Joseph Lalhimpuia chuan, central service, doctor leh engineer-ahte Mizo ṭhalai tam zawk an inziah tlin theih nan MYC hmalakna leh sum sensote chu a theuneulo hle tih sawiin, "State dangte senso ai pawhin a sang a ni," a ti a; ṭhalaite hmakhua ngaitu sorkar a ding chu Mizo ṭhalaite vanneihna a nih thu leh, India rama zirna ṭha ber ber Mizo ṭhalaite'n an dawn ve theih nan MYC-in hma a lak zel dawn thu a sawi.

Coaching senso tur hlanna inkhawm hi Hotel Ritz, Aizawlah neih a ni a; MYC Chairman chuan ALS national sales head Prateek Bhattacharya hnenah cheng nuai 159.3 chegue a hlan a, sum hi MYC hnuaia UPSC, IIT-JEE/NEET a zirlai zir mekte zirna leh fee MYC-in a tumsak chin a ni.

MYC chuan VSAT (Very Small Aperture Terminal), New Delhi aṭanga coaching centre tina online a pek chhuah­na khawl lei nan leh classroom enkawlna leh pawimawh dang atan sum tam tham tak a lo sêng tawh a; ALS hnena cheng nuai 159.3 hlanna hunah hian ALS leh MYC thawhhonaa centre hrang hrang senso phuhrûk nan ALS chuan MYC hnenah cheng nuai 32.12 a hlan ve bawk.

MYC leh ALS thawh dunnaa Aizawl leh Lung­leia coaching centre-ah IAS coaching kal mek mi 131 an awm a, IIT-JEE & NEET coaching centre pasarihah zirlai 396 an awm mek bawk a ni.