MLA aṭangin Rinliana Sailo a báng dawn

Congress party MLA Lalrinliana Sailo, Tuichang bialtu chuan MLA aṭangin bànna a thehlut dawn a, Congress party aṭanga bânna thehluh a tum bawk.

Vanglaini palai zawh­na chhangin Lalrinliana Sailo chuan, tun kar hian MLA leh Congress party aṭanga bânna a thehluh tur thu hi a sawi a, "Ka bial mipuiin district function an beisei a, keini'n kan function tir thei si lo. Function tir nghal tura inpuang party chu bial mipuite avangin ka ken mai a ngai a ni," a ti.

Lalrinliana Sailo chuan, Tuichang consti­tuency-ah ṭum thum MLA atan thlan tlin a nih tawh thu sawiin, "Inthlan hnuhnung berah vote 3,000 chuangin ka chak a. Minister ka nih loh tâkah chuan bial ka vil ṭha a, kum khatah vawi 10-te ka kal a ni. Ka tlin leh ka ring khawp mai," a ti a; Congress Legislature Party (CLP) meeting-a an koh loh leh a aiawh tur Congress lamin an zawn hnuah erawh chuan MNF senior vice president Tawnluia boruak a sân chak thu a sawi.

MLA candidate nih a tum leh tum loh zawhna chhangin Lalrinliana Sailo chuan, "Ram tana hna thawk turin thil dang ti loin kan inpe a, ram rawngbawl dan tur kan zawng zel ang chu. Party dang zawm tura tihchian ka la nei lo a, rilruah chuan hnai deuh chu a awm," a ti.

Lalrinliana Sailo hian September 28, Zirtawpni khan Khawzawl bazara vantlang inkhawmah thu sawiin, a bial (Tuichang) mipuite thlahna thu a sawi a ni.