Mizoramah National Peoples' Party din a ni ; Sorkar siamtu-ah kan tel dawn - NPP President

National Peoples' Party (NPP) chu Mizoramah din a ni a, din a nih thu hi September 29, Inrinni khan Aijal Club-ah NPP president Conrad Sangma, Meghalaya chief minister-in puangin, Mizoram Assembly-a sorkar siamtuah an tel dawn niin a sawi.

Conrad Sangma chuan, NPP tum ber chu India hmarchhak mipui, Kristian leh sakhaw tênau dang bakah, tribal-te dikna humhalh leh vawnhim a nih thu a sawi a; NPP dintu PA Sangma (L)-in hmathlir thui tak a nei tih sawiin, "Amah awm tawh lo mahse a thil tumte a la nung reng. India ramah tribal mi maktaduai 100 chuang kan awm a, kum 1995 khan sorkar laipuiah cabinet minister kan nei ve chauh a, kan chan tur kan chang pha ngai lo," a ti.

NPP leh BJP chu kalphung leh ngaihdan hrang daih an nih thu sawiin Sangma chuan, "BJP hian kan kalphung leh ngaihdan tibuai zawnga kal an tum chuan kan thláwp lo ang. Kan tih tur chu ram hmsawnna atana thawh a ni a, chuvang chuan BJP nen kan thawkho a, an ngaihdan kan ṭâwm tihna a ni lo," a ti a; NPP chu a din chhan anga a kal zel dawn thu a sawi.

Tribal-te chu reservation tel loa an kal theih hunah hma an sawn lehzual tur thu sawiin Conrad Sangma chuan, "Hmarchhak ṭha­laite'n theihna kan nei. Reservation hi kan chanvo a ni a, kan chang tur a ni. Mahse, hetah ringawt hian i innghat lo ang u. Khawvel dang el phak tum ila, chona thar i hmachhawn ngam ang u," a ti.

Conrad Sangma chuan, an party tan Mizoramah a mala sorkarna siam a harsat tur thu sawiin, "Kum khat chuang Mizoram kan zir chiang tawh a, party mala sorkarna siam thei an awm dawn lo tih kan chiang. Sorkara tel ve ngei turin hma kan la a, kan tel ve ngei dawn a ni. Mizo mipuite'n kalphung ngai an ning tawh," a ti a, candidate an neih zat tur an la tihchian loh thu a sawi.

NPP vice president Phunzathang Tonsing chuan, NPP dintu PA Sangma-a'n Kristiante leh tribal-te a ngaihtuah hle tih a sawi a; "Congress hi Mizoramah kum 10 an sorkar tawh a, ke dem lo. Mahse, an hlui tawha thlak an ngai. NLUP-te hi an siam a ni lo, Central sorkar siam a ni," a ti.

NPP thupuangtu leh Meghalaya Home minister James Sanghma pawhin, "PA Sangma hi kan zingah awm tawh lo mah se, a thil tum tihlawhtling turin keini hi mi duh a ni," a ti a; NPP chuan a dintu thil tum tihlawhtling turin ṭan an la zel dawn tih a sawi.

NPP hi kum 2012-ah Lok Sabha speaker hlui leh Meghalaya chief minister hlui PA Sangma-a'n a din a; tunah hian party dang nen ṭang rualin Meghalaya-ah sorkarna an siam a, Manipur, Nagaland leh Rajasthan-ah MLA an nei bawk. Mizorama NPP convener atan Lianzuala an ruat a, a kaihhruainain hruaitu dang an la ruat dawn a ni.