KHAWTHLIR

Thisen pe
Inrinni khan Ramhlun Vengthar Branch KṬP-te'n Synod Hospital tan thisen unit 36 an pe a, a petute mipa 31 leh hmeichhia panga an ni. Lawngtlai Vengpui Unit ṬKP pawhin Lawngtlai District Hospital tan thisen 13 an pe a, a petute mipa pariat leh hmeichhia panga an ni. Aizawl Civil Hospital tan Ramhlun Sports Complex Branch KTP-in thisen unit 12 pein, a petute mipa pariat leh hmeichhia pali an ni a; Zarkawt Serpents Basketball Club-in unit 6, Lallianmawia Pachuau Fans Club-in unit 4 an pe a, individual donor pahnih an awm bawk.

National Voluntary Blood Donation Day
Vawiin, October 1 hi National Voluntary Blood Donation Day a ni a, Aizawl leh district hrang hrangah MSACS, Blood Bank leh Association for Voluntary Blood Donation huaihawtin hman a ni dawn. Aizawl-ah chuan Hrangbana College Golden Hall-ah hman a ni dawn a, inkhawm tawi neih zawhah thisen pek rûnpui huaihawt a ni ang.

MLA-in hawng
Zemabawk North Branch YMA Committee Room chu Inrinni khan bialtu MLA R Lalrinawma'n a hawng. Committee Room hawn tak hi Rs. 6,00,000 sênga sak a ni a, a dung ft. 44 leh a vâng ft. 21 a ni.

Lungphùm phúm
Chaltlang venga DIET ram chhunga Mizoram Board of School Education (MBSE) building sak thar tur lungphùm tun hnai khan School Education minister H Rohluna'n a phúm. Rohluna chuan, zirna lama an thil tum zinga pakhat chu - naupang tan result ṭha neih a nih thu a sawi. Building hi cheng vbc. 10 sênga sak tura ruahman a ni.

CM-in hmanpui
Mizoram Police Service Association (MPSA) chuan September 28, 2018 khan Arya Mess, Police Hqrs.-ah khawmpui an hmang a, tlai lama an hun hmanpuitu chief minister Lal Thanhawla chuan police-te chu mipui thlamuantu leh innghahna an nih angin mipuite tan ṭhian ṭha ni turin a chah a, "Police-te hi Mizoramin remna leh muanna a neih kengkawhtu pawimawh ber an nih thu leh an laka mipui beisei pawh a sang a ni," a ti.