Doctor dah phuta sorkar nawrna atan Champhaiah lungawi lohna lantir mek

MZP headquarters, Champhai chuan Champhai District Hospital-ah doctor dah belh tura sorkar nawr nan September 28, 2018 khan Champhaia zirna-in leh sorkar pisa zawng zawng an khâr tawh a; vawiinah pawh khâr chhunzawm leh an tum bakah, kawng an zawh dawn.

Champhai MZP-in ruahmanna an siam dan chuan, vawiina zirna-in leh sorkar pisa zawng zawng khâr tur tih hian bank-te pawh a huam dawn a, ATM booth erawh a huam lo.

"Pisa kái lui an awm a, harsatna a awm chuan anmahni mawhphurhna a ni ang, function reng reng neih a rem tawh lo," an ti a; petrol pump leh PHE tui semte erawh a huam loh tur thu an sawi.

Kawng zawhnaah hian college leh higher secondary school zirlaite tel tura beisei an ni a; Champhai College zirlaite'n Bethel Veng kâwn aṭanga zawh ṭanin, Champhaia HSS zirlaite'n Vengsang biak-in kawt aṭangin an zawh ṭan dawn a, DK Traffic Point, Vengthlangah an intâwk khawm ang.

An hmalaknain awmzia a la neih loh chuan total bandh huaihawt an tum a; "Zirlaite'n hma kan lakna kawngah theih­tawpa nawr chhunzawm ṭha kan ti a, rálmuang taka kan duty laia Mizoram sorkarin doctor min pe lo chhunzawm a, zirlaite'n kut kan tuar a nih chuan MLA inthlan lo awm turah vote thlak lo tur leh an voter ID submit turin zirlai 500 chuangin intiam nan hming an ziak a ni," an ti.

Champhai khawpui bakah hian, Hnahlan, Khuangleng, South Khawbung, Dungtlang leh Farkawnahte pawh vawiin aṭangin zirna-in leh sorkar pisa zawng zawng khâr a ni dawn niin an tarlang bawk.

Champhai Ṭhalai Pawl (CṬP) chuan thuchhuah siamin, Champhai MZP-te'n doctor neih belh phut a zirna in leh pisa kai turte an dang chu an thlawp thu tarlangin, "CṬP pawhin doctor kan mamawhna leh thawktu hrin hrim kan mamawh thu hi sorkar­ah kan lo thlen tawh ṭhin a ni. A theih zawn apiangah zirlaite tha tichak turin kan in inpeih reng a ni," an ti.