RIPANS Graduation & Lamp Lighting

Regional Institute of Paramedical and Nursing Sciences (RIPANS) chuan September 28, 2018 khan an campus-ah Graduation and Lamp Lighting Ceremony an hmang a, Mizoram University vice chancellor Prof. RS Sambasiva Rao-a'n hmanpuiin, zirlai ti ṭha zualte hnenah proficiency award a hlan.

RIPANS Graduation and Lamp Lighting Ceremony-ah hian B.Sc. (Nursing) zir thar turte chu Christian Hospital Nursing School principal Vanlalthlengliani kaihhruaiin bati chhit leh thutiam chhamna hun hmanpui an ni a; RIPANS director Dr Chawngthanliana'n graduate leh post graduate tharte hnenah certificate of appreciation a hlan.

Inkhawmah hian India hmarchhak state hrang hrang aṭangin zirlai graduate tharte leh B.Sc. (Nursing) first year zirlai nu leh pate'n an hmanpui a ni. Kuminah hian graduate leh post graduate degree nei thar zirlai 159 an awm a; chungte chu - B.Sc. (Nursing)-ah zirlai 35, B.Sc. MLT-ah zirlai 26, B.Pharm.-ah 31, B.Optometry-ah 23, BSc. RIT-ah 31 leh M.Pharm.-ah zirlai 13 an ni.

RIPANS hi kum 1996-ah North Eastern Council-in India hmarchhak mite tan a din a ni a, April 2007-ah sorkar laipuia Ministry of Health and Family Welfare hnuaiah a awm. Tunah hian degree course panga bakah, kum 2014 aṭangin Pharmacy department-ah master degree zirna hawn a ni. Course hrang hrangah hian zirlai 668 an awm mek.