ZPM-in AMFU rawtnate an thlâwp

Zoram Peoples' Movement (ZPM) chuan thuchhuah siamin, All Mizoram Farmers’ Union (AMFU)-in September 28-a ‘Zoram kut hnathawktute chhan­chhuahna kawngzawh’ an huaihawt leh an au thâwmte chu thlâwn lo se an duh thu an tarlang a; AMFU-in land reform atana an rawtnate chu an thlàwp thu an sawi.

Congress leh MNF party-te'n Mizoramah kum 31 leh thla sarih ro an rel chhungin ku thnathawkte hamṭhatna lam policy ṭha leh chhawr ṭangkai tak tak an nei ngai lo niin an sawi a, "In kawtkaiah sawh­thing kg. khat Rs. 10-in kan leisak ang che u, titu MNF sorkar chuan leisak a hnêkin Mizoram páwna sawhthing hralhtute police ûmtirin an man a, Vairengteah checkgate siamin an tibuai bawk ṭhin. Congress sorkarin sawhthing lei hi kan bat a ni lo, tiin kut hnathawktute hmusit takin an ṭawng khum a ni," an ti.

ZPM tarlan danin, Congress sorkar leh MNF sorkarin Sundar Ali an thurual pui ve ve a, Sundar Ali chuan sawhthing man a duh duhin a chinglet ṭhin. Congress sorkarin an duh thála Sundar Ali nen sum an siam theih nan Mizoram páwna thlai hralh chhuah khuahkhirhna ‘The Mizoram Agricultural Produces (Restriction on Movement) Order, 1994’ a siam a; chu dan chu MNF sorkarin ‘Mizoram Agriculture Products (Prohibition of Movement) (Amendment) Order, 1999’ tiin, khuahkhirhna chu khapna danah an thlak a ni.

Order (dan) pahnih - ‘The Mizoram Agriculture Produces (Restriction on Movement) Order, 1994’ leh ‘The Mizoram Agriculture Products (Prohibition of Movement) (Amendment) Order, 1999’ te chu ku thnathawktute hrêkbehna leh nêkchêpna a nih avangin AMFU kawngzawhte chuan Chanmari kâwnah an hâl ta niin ZPM chuan an tarlang.

ZPM chuan, kut hnathawkte tan a theih ang tâwka hma lain an lo au tawh ṭhin tih sawiin, "Tuna kan CM candidate Lalduhoma pawh hi mimal taka au hnem berte zinga mi a ni. ZPM a sorkar hunah he order (dan) ṭha lo tak pahnihte hi paihin, sawhthing kg.-ah Rs. 50 leh hmunphiah kg.-ah Rs. 100-in kan lei ngei dawn a ni," an ti.