Lawhleng chanchinbu din champha lawm

Haulawng khuaa Pathianni apianga chhuak chanchinbu 'Lawhleng' chuan September 29, Inrinni khan kum 17 a tlin champha (septendecinnial) Hau­lawng YMA Rûnah an lawm a, MJA general headquarters president Zonunsanga Khiangte khuallian niin, Lunglei IPRO C Lalremruati khualzahawm a ni.

Inkhawm hi Lunglei District MJA president H Lalthansanga'n a kaihruai a; Lawhleng editor Lalhmachhuana Ralte chuan Lawhleng chanchinbu chu an khawtlang hruaitute vanga tihchhuah mek a nih thu a sawi.

Zonunsanga Khiangte chuan, tunlaiah social media leh chanchinbu an inbei mek nia sawiin, "Social media-a thu post-te chu a confirm nan miin chanchinbu emaw, TV leh radio an la hmang ber," a ti.

Journalist-te'n theihtawpa fimkhurin chanchin thar an ziah ṭhin thu sawiin MJA President chuan, "Dan kalhin news kan ziak em tih kan inteh fo ṭhin. Social media-a thu post ang mai maiin news kan ziak ve mai mai lo," a ti a; journalist-te chu sorkar nen an thawhhona ṭha ṭhin mah se, sorkar chanchin ṭha lo ziah an tîm chuang lo tih a sawi.

Lunglei IPRO C Lalremruati pawhin thu sawiin, journalist-te nen an thawhhona a ṭhat thu a sawi a, "Media-a thawkte hi mipui tan an ṭangkai ber a, sorkar tan pawh ṭangkai tak an ni zel a ni," a ti.