BJP leh NPP-in inzawmna nei lo

BJP, Mizoram Pradesh chuan thuchhuah siamin, September 29, Inrinnia Aizawla din thar, National Peoples Party (NPP) nen inzawmna an neih loh thu leh an thil tihte chu an hriatpui loh thu an tarlang.

Mizoram BJP chuan, NPP-te'n Mizoramah hma lain, inthlan dawn hnaihah ram hmangaih ber ni âwm taka Mizoram­ah an indin thu sawiin, "NPP hi NEDA-ah telin, BJP nen kan thawkho tho a, chuvangin Mizoram BJP nen thuhmun kan ni, ti zawngin thu an thehdarh chiam mai a. Hei hi thu dik lo a ni. NPP hi BJP Mizoram nen inkungkaihna pakhatmah kan nei lo a, an thil tih hi kan hriatpui lo," an ti.

NPP chu thuneihna chan duha inthlan dawn hnaiha hma la an nih thu sawiin BJP chuan, "Tun hmain engmah Mizoram tana an thil tih kan hre ngai lo. Tunah inthlan hmachhawn mai tur kan ni a, thuneihna chan tuma hma an lakna hi Zoram mipuite'n en dan tâwk kan thiam a pawimawh," an ti a; NPP zawmtu mi ṭhenkhatte chu an awmna party-a mite'n hruaitu atan an hnâwl, mi beidawng, lalna leh hruaitu nihna duh si awm khawm an nih thu an tarlang.