Doctor indaih lohna sukiang turin hma la
Health & Family Welfare department chuan thuchhuah siamin, Champhai District Hospital-ah opthalmologist a awm loh vanga Champhai khua leh a chhehvela awmte'n harsatna an tâwk chu pawi an tih thu leh, harsatna sukiang turin hmalak mek a nih thu an tarlang.
HFW department chuan, doctgor indaih lohna sukiang turin specialist doctor panga leh doctor dang 31 la turin MPSC-ah thawn a ni tawh a, MPSC pawhin advertisement a chhuah tawh tih an tarlang a, "Doctor (specialist) panga lak tur zinga opthalmologist pakhat hi Champhai District Hospital tana ruahman sa a ni. Doctor (orthopaedics) erawh chu indaih lohna a nasat êm avangin tunah chuan department-in dah mai tur a nei rih lo," an ti.
Health department chuan, sorkarin doctor indaih lohna phuhrûk turin theihtawpin hma a la reng tih hriatsak tur leh department-in harsatna a hmachhawn mek hriatthiampui turin mipui an ngen a ni.