Kuhva tawlh rûk check gate siam Mizoram sorkar ngaihtuah turin dah
Central YMA office bearer-te chuan February 4, Zirtawpni khan Home minister Lalchamliana a pisaah an kawm a, ram páwn khawchhak lam aṭanga dan loa kuhva rah tawlh rûk tihtawp dan tur an sawipui. Kuhva tawlh rûk enfiahna leh danna atana check gate siam belh leh tihchangtlun dan tur chu Mizoram sorkarin a ngaihtuah turin an dah.
CYMA office bearer-te'n Home Minister an kawmnaah hian Inspector General of Police (IGP) leh police hotu dangte an tel a; CYMA hruaitute chuan chief minister Zoramthanga hnenah an thlen tawh - kuhva tawlh ruk danna tur check gate siam tura an ngenna chungchang an sawipui a ni.
Home minister Lalchamliana chuan, CYMA-in kuhva check gate siam chungchanga Chief Minister hnena lehkha an thehluh chu bawhzui turin Chief Minister-in a (Home Minister) kuta a dah thu a sawi.
Lalchamliana chuan, kuhva tawlh rûk tihtawp a nih theih nan YMA leh police-te theihtawp chhuaha thawkho turin a chah a; CYMA hruaitute pawhin an thu thlente sorkarin ngai pawimawh a, tihhlawhtlin dan tur a ruahman chu lawmawm an tih thu an sawi a ni.
Inkawmhonaah hian Myanmar aṭanga Mizoram kaltlanga dan loa kuhva tawlh rûk tihtawp theih dan tur sawiho a ni a; CYMA hruaitute chuan kuhva tawlh rûk an duh loh chhan te, khawtlang leh mimal nun a nghawng dante leh hma la tura sorkar an beisei dante an sawi. Police hotute pawhin hma an lak dan leh kuhva tawlh rûk an man tawh dante an sawi bawk.
CYMA office bearer-te chuan January 19, 2022 khan CM Zoramthanga a pisaah kâwmin, dan loa kuhva tawlh rûk danna turin checkgate mumal tak siam tura ngenna an thlen a; Chief Minister chuan, Myanmar aṭanga dan loa Mizorama kuhva tawlh rûk tihtawp a duh thu te, YMA-in kuhva tawlh rûk chungchang zirchianna a kalpui chu lawmawm a tih thu te, hmalak dan tur rawtna an neih hunah theihtawpa bawhzui a ṭul thu te, kuhva tawlh rûk donaah sorkar, political party-te leh tlawmngai pawl dangte ṭan rual a ṭul thute a lo hrilh a ni.
Central YMA chuan dan loa kuhva tawlh rûk chungchang zirchianna a kalpui mek a, Aizawl bika zirchianna chu an zo tawh. Champhai district lamah pawh aiawh pakhat chu an tír tawh a, a huhoin kar leh lamah kal chilh leh an tum thu, chairman Prof. Malsawmliana, CYMA assistant secretary chuan Vanglaini a hrilh.
Hmalak dan tur Inkawmnaa duante
1. Sorkarin check gate hawn belh dan tur leh tihchangtlun dan tur a lo en zui ang.
2. A theih ang angin check gate-a police duty-te dah belha tihchangtlun turin sorkarin hma a la ang.
3. Dan loa kuhva tawlh rûk donaah YMA-te'n police-te ṭanpuiin a thawhpui ang.