Aizawla veng 83 zinga 65 red zone

Aizawl district-ah khua leh veng 87 chu Covid-19 red zone-ah puan mek a ni a, Aizawl khawpuia veng (local council) 83 zinga 65 chu red zone a ni mek.

Aizawl bawrhsap Dr Lalhriat­zuali Ralte chuan February 4, Zirtawpni zan khan Aizawl district-a khua/veng 87 chu red zone-ah a puang a, tuna puan mek hian February 8, 2022 zanlai dar 12 thleng a awh ang. Red zone nihna hian ni sarih a awh phawt ṭhin a, ni sarih hnuah a ṭul chuan puan nawn leh tur a ni. DC thuchhuak lo chuan red zone puan leh hlih phal a ni lo.

Dr Lalhriatzuali Ralte chuan, chief medical officer-te hnen aṭanga zirchianna dawn angin incidence rate chhût a nih thu a tarlang a, "Health & Family Welfare department-in January 31, 2022-a inkaihhruaina a duan angin zone ṭhen hranna siam a ni a, Covid-19 incidence rate mi 1,000 zela mi 10 aia tam positive neite chu red zone-ah dah an ni. Incidence rate hi ni sarih chhung Covid-19 positivity rate leh population aṭanga chhût ṭhin a ni," a ti.

Aizawl Bawrhsap chuan, orange zone leh green zone-a veng/khua awmte pawh hri darh dan dinhmun azirin red zone-a puang kher lo pawhin containment zone-ah puan theih an nih thu a tarlang bawk.