Aizawl by-pass road atan Project buaipui mek a ni

Ministry of Road Transport & Highways hmalaknaa NHIDCL-in Aizawl by-pass road an siam turah detailed project report (DPR) buaipui mek a ni a, an zawh thuai beisei a ni.

NHIDCL chuan con­sultant-te hnenah December 8, 2021 khan kawng kalna tur (align­ment) an ruahman chu pawm a nih thu leh DPR siam nghal tura hriattir­na lehkha an pe a ni. Consultant-te chuan DPR an buaipui mek a, an zawh thuai theih beisei a ni. DPR siam zawh a nih hnua sanction hmuh a nih veleh tender chhuah a, hna ṭan nghal tura ruahman a ni.

Ruahman dan chuan, Aizawl by-pass road chu Silchar aṭanga four lane tàwpna aṭanga inṭanin, Sairang bula Kurung lui kânin Rangvamual ep pangah a chho dawn a, Bawngkawn Brigade Field hnuaia chhoin, chuta ṭang chuan lei verh ṭan a ni ang.

Lei verh chu Zema­bawk-Selesih kawnga Muthi ram velah a chhuak dawn a, chuta ṭang chuan Muthi tlang pangah her liamin, Tuirial Airfield hmàr lamah Tuirial lui a kân dawn a, Seling bul Phaibâwk bul velah kawngpui pangngai a fin dawn a ni.

Aizawl by-pass road inṭanna aṭanga Phaibawk hlat zawng chu km. 28.90 a ni dawn a, tuna NH kawngpui pangngaiah chuan km. 56.40-a hlá a ni thung a; kawng thar chu km. 27.50-in a tawi zawk dawn.

Kawngpui thara lei verh chu kaw hnih (twin tunnel) tura ruahman niin, km. 2.45-a thui ni tura ngaih a ni a, in awm­na (built-up area) vela lei verh chung chhah lam chu metre 468-491 tura ruahman a ni bawk.