Siaha district-a chhungkaw 525 hnenah SEDP ṭanpuina pek a nih dawn - Beichhua

Siaha bialtu MLA Dr K Beichhua, minister of state chuan February 5, Inrinni khan Lobo-Tluangram-Haka inkara North Eastern Council (NEC) sum vbc. 51 sênga international border trade kawngpui sial mek a tlawh. Minister chuan, Siaha district-a chhungkaw 525 hnenah SEDP aṭangin ṭanpuina pek a nih dawn thu a sawi.

Dr K Beichhua chuan, Lobo leh Noaotlah khuaah thu sawiin, eptu party-te'n SEDP hnuaia hmalakna awm lo leh beneficiary base-a ṭanpuina sem thei lo turin an sawi ṭhin tih a sawi a, "Tun aṭanga rei lo tê, financial year tharah chuan chhungkaw 60,000 aia tlem lo hnenah Rs 50,000 ṭheuh first instalment atan kan sem dawn," a ti.

Siaha district-ah pawh SEDP ṭanpuina sem a nih dawn thu sawiin Beichhua chuan, "Sericulture department hnuaiah beneficiary chhungkaw 150, Horticulture department-ah chhungkaw 75 leh Agriculture department hnuaiah chhungkaw 300 an tel dawn," a ti a; SEDP aṭangin hmasawnna ruhrel tam tak bakah, vantlang himna, hriselna lam, kawng leh thil dangah hna an thawk nasa niin a sawi.

Lobo-Tluangram-Haka inkar kawng hi km. 13-a thui tur a ni a, Tantia Constructions-in an thawk. Kawngpui hi meter 7.5 leh pavement area meter 5.5 a zau a ni a, January 2022-ah thawh ṭan niin, km. 3-a thui kawng laih a ni tawh. Kawngpui sialna turah hian Lobo khaw mipui chuan zangnadawmna beisei loin a thláwnin ram an pe a ni.

Dr K Beichhua hian Noaotlah khuaa Eklavya Model Residential School (EMRS) sak mek a tlawh bawk a, contractor-te chu November 2022 ral hmaa thawk zo turin a hrilh. Lobo leh Noaotlah khuaa Myanmar ráltlânte hnenah pawisa a pe bawk.