February ni nga chhungin hripui vei 10,205 hmu

Mizoramah Covid-19 vei February 4, Zirtawpni khan mi 1,777 leh February 5, Inrinni khan mi 1,754 hmuh chhuah a ni a, February thla ni nga chhungin mi 10,205 hmuh a ni tawh. Inrinni leh nimin khan hripui vei dam tawh mi 3,403 chhuahtir an ni a, Covid-19 vei mi pali an thi.

Covid-19 vei February 4-a hmuh chhuahte chu mipa 762 leh hmeichhia 1,015 an ni a; RT-PCR hmanga hmuh 332, TrueNAT hmanga hmuh 51, RAT hmanga hmuh 1,373 leh FIA hmanga hmuh 21 niin, positivity rate chu 27.38% a tling.

Inrinnia swab sample endika Covid-19 positive hmuh chhuah mi 1,754-te chu mipa 768 leh hmeichhia 986 an ni a; RT-PCR hmanga hmuh 493, TrueNAT hmanga hmuh 98, RAT hmanga hmuh 1,113 leh FIA hmanga hmuh 50 niin, positivity rate chu 26.45% a ni.

February 1 kha Mizorama Covid-19 vei hmuh tam ber ni a nih rualin, hmuh chhuah zat ni tin a tlahniam tial tial a; February ni 1-ah 2,573, ni 2-ah 2,145, ni 3-ah 1,956, ni 4-ah 1,777 leh ni 5-ah 1,754 hmuh niin, February thla ni nga chhunga hmuh tawh zat chu 10,205 a ni. Positivity rate 25% chung lamah vek a awm.

February 5, Inrinnia hripui vei hmuh zingah RAT hmanga Muallungthu khuaa hmuh mi 77 an tel a, Home Missions School Hostel-ah mi 51 leh Zobawk khuaah mi 43 hmuh a ni bawk.

Nimin tlai dar 5 thleng khan hripui vei dam tawh mi 1,507 chhuahtir an ni a; Inrinni khan mi 1,896 chhuahtir an ni.

IDSP record angin, Mizoramah Covid-19 vei 1,85,227 hmuh chhuah a ni tawh a, mipa 87,318 leh hmeichhia 97,909 an ni a, mipa aiin hmeichhia 10,591-in an tam zawk. Nimin tlai dar 5 thleng khan mi 1,71,256 (92.46%) chhuahtir an ni tawh a, mi 623 (0.34%) thi tawhin, enkawl mek mi 13,348 (7.20%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,85,227 chu mi 1,000 zelah hripui vei mi 169 an awm ang a ni a; mi 1,00,000 zela Covid-19 vangin mi 56 an thi tawh ang a ni tih sorkar thuchhuakin a tarlang.