Covid-19 vangin 623 thi tawh

Nimin khan tlai dar 5 thlengin Mizoramah Covid-19 vangin mi pahnih an thi a, February 5, Inrinni khan mi pahnih leh February 4, Zirtawpni tlai khan mi pakhat an thi bawk. Mizoramah hripui vangin mi 623 an thi tawh a, kumin February thla ni ruk chhungin mi 13 an thi tawh.

Zodinmawia (thla 4), Hortoki, Kolasib district chu hripui vangin February 4 tlai 4:50 khan Kolasib Dedicated Covid Health Centre (DCHC)-ah a thi a, a thi hma lawk, February 4-ah vêk khan Covid-19 positive a ni tih finfiah a ni.

February 5, Inrinni zing dar 1:10 khan JH Zomawia (72), Ramlaitui, Lunglei district chu hripui vangin State Referral Hospital-ah a thi a, Covid-19 vei a ni tih January 30, 2022 khan hmuh chhuah a ni. H Lalrinawma (59), Armed Veng pawh Inrinni zing dar 1:40 khan SRH-ah a thi a, Covid-19 vei a ni tih December 28, 2021 khan hmuh a ni. Inrinnia thite hi natna dang nei tel ve ve an ni tih sorkar thuchhuakin a tarlang.

Nimin chawhma dar 10:35 khan PC Lalthankima (60), Hrangchalkawn, Lunglei chu hripui vangin SRH-ah a thi a, Covid-19 positive a ni tih February 4 khan hmuh niin, a tuk February 5-ah SRH-ah dah a ni a, natna dang nei tel a ni.

Covid-19 vei enkawl mek Lalremruata (67), Salem Veng, Aizawl pawh nimin chawhnu dar 2:35 khan SRH-ah a thi a, Covid-19 vei a ni tih December 15, 2021 khan finfiah niin, December 22, 2021 aṭangin SRH-ah enkawl a ni.