CMO leh Med.Supdt chelh kawp turin Sorkarin medical officer-te a ruat Congress ṭhalaite'n siamṭhat an phût

Mizoram sorkar chuan district thar pathum - Saitual, Khawzawl leh Hnahthialah chief medical officer (CMO) leh medical superintendet (Med.Supdt) post siam loin, CMO leh Med.Supdt. mawhphurhna la turin district khawpui pathuma medical officer awm mekte a ruat a; hei hi Congress ṭhalaite chuan ṭha an tih loh thu an puang.

Health & Family Welfare Secretary chuan February 2, 2022 khan notification tichhuakin, Saitual, Khawzawl leh Hnahthiala medical officer (doctor) ni laite chu CMO leh Med.Supdt hna chelh kawp turin a hriattir a ni. Saitualah Dr V Lalremruata, Khawzawlah Dr Albert Lalhminghlua leh Hnahthialah Dr Lalrengpuii Ralte te an awm.

District thar pathuma CMO leh Med.Supdt dah chungchangah hian MPYCC chuan, medical doctor senior tawh tak tak an awm laia kalphung pangngai ni loa medical officer-te CMO leh Med.Supdt atana ruat an ni chu doctor-te service zah lohna lian tak a nihthu an tarlang a, "Kalphung dika siamṭha vat turin kan phût," an ti.

MPYCC chuam, CMO leh Med.Supdt chu hna hrang hlak a ni tih sawiin, "Khawi hmunah mah nih kawptir an ni ngai lo a, Med.Supdt phei chu senior specialist-te'n an chelh tlangpui ṭhin," an ti a; district thar pathum tan CMO leh Med.Supdt post siam dilna chu DPAR-in phal tawh mah se, tun thlengin post siam a la ni lo tih an sawi.

Post thar siam chuang loa duh duha sorkarin kalphung kalha nihna a ruat chu MNF sorkarin mipui an tham lohzia tilangtu a nih thu sawiin MPYCC chuan, "District neitute tan pawh hian post siam loa hetianga MO an neih laite CMO leh Med.Supdt atana ruat an ni ringawt hi a tlàwm thlak hle. Mizoram sorkar hian HFW department a ngai pawimawh a nih chuan post hi siamsak mai se, a tling leh a chelhtu tur dik takin CMO leh Med.Supdt hna hi chelhtir rawh se," an ti.