Covid-19 zone ṭhen dan tur sawiho

Lawngtlai district-a Covid-19 hluar dan aṭanga zone thliar dan tur chungchangah district bawrhsap Dr Andrew H Vanlaldika kaihhruaiin February 4, Zirtawpni khan sorkar hotute'n hmalak dan tur an sawiho a; hripui vei awmna khua leh veng tina a hluar dan leh vei an pun chak dan azirin green zone, orange zone leh red zone-ahte ṭhen an rêl.

Operational guideline-in tehna hrang hrang chi li a chhawp zingah chawlhkar khat chhunga khua/veng pakhata mihring 1,000 zela chhûta hripui vei thar tam dan azirin - hripui vei mi panga aia tlem chu green zone (hlauhawm lo), mi 5-10 inkar chu orange zone (hlauhawm dan laihâwl) leh mi 10 aia tam chu red zone (hlauhawm)-ahte thliar tur a ni.

Hripui vei thar zat chu chawlhkar khat chhunga a lêta a pun chuan red zone, ni 7-10 inkara a lêta a pun chuan orange zone leh, a lêta pun nan ni 10 aia rei hun a duh chuan green zone-ahte thliar tur a ni. Hripui vei zat aṭanga thihpui an tam dan azir leh sample endik zat aṭanga positive an tam dan azirin zone chi thumah thliar tur a ni bawk.