MHA-in Bru chhawmdawlna a titawp ; Bru pawl pakhatin titawp lo turin an ngen

Sorkar laipuia Ministry of Home Affairs (MHA) chuan September 29, 2018-a lehkha a tihchhuah angin, Tripura relief camp-a awm Bru-te hnena chhawmdawlna pekte chu nimin aṭang khan tihtawp a ni. Hetih lai hian, Bru pawl pakhat, Mizoram Bru Indigenous Democratic Movement (MBIDM) tih invuahte chuan MHA leh Tripura sorkar chu chhawmdawlna titawp lo turin an ngen.

MHA, Mizoram sorkar, Tripura sorkar leh Mizoram Bru Displaced People Forum (MBDPF)-te'n July 2, 2018-a New Delhi-a inremna an ziah angin, Tripura relief camp-a Bru-te Mizorama hruai kîr hun chu September 30, 2018 khan a tàwp a, mahse, Bru chhungkaw 40 chiah Mizoramah an lêt duh a ni.

Kanchanpur-a North Tripura Sub-Divi­sional Magistrate (SDM) chuan September 28, 2018 khan MBDPF president A Sawi­bung hnenah lehkha thawnin, relief camp paruka Bru-te hnena sorkar laipuiin chhawmdawlna a pek ṭhin - buhfai, pawisa, ei tur leh thil dangte chu October 1, 2018 aṭanga tihtawp a nih thu a hriattir.

Kanchanpur SDM chuan hriattirna hi MHA Joint Secretary leh Tripura sorkara Revenue Additional Secretary-te nena an inbiak hnua tihchhuah a nih thu a tarlang.

MHA, Mizoram sorkar, Tripura sorkar leh MBDPF inremna ang chuan relief camp-a Bru-te Mizorama hruai kir hna chu September 30, 2018 thleng thawh tur a nih thu tarlangin Kanchanpur SDM chuan, "Inremna thlirin sorkar laipuiin Bru-te hnena ṭanpuina hrang hrang pek ṭhinte hi October 1, 2018 aṭangin tihtawp a ni," a ti.

Vanglaini palai zawhna chhangin Home department hotute chuan, Bru lak let tura hun bituk a tawp hnuah, ruahmanna dang an neih tawh loh thu an sawi a, "MHA lamin hruai kir hna thawh leh tur a tihte chuan ruahmanna siam leh a ngai a ni mai a, keini lam chuan ruahmanna dang kan nei tawh lo. MHA aṭangin engmah kan la dawng lo," an ti a; Bru-te chhawmdawlna pek tihtawp chungchangah MHA lam aṭangin hriattirna an dawn ve loh thu an sawi.

Hetih lai hian, MHA hotute chuan chhawm­dawlna tihtawp bakah hian, Tripura-a Bru camp parukte chu October 2018-ah tih­tawp a nih tur thu an lo sawi tawh a ni.

MHA lehkha tihchhuah hnuah hian MBIDM chuan thuchhuah siamin, relief camp paruka Bru mi 35,000 velte hnena chhawmdawlna pek ṭhin chu titawp lo turin MHA leh Tripura sorkar an ngen a; tuna an awmna cheng tura an dikna chanvo (right to live) leh, ei leh bar, vantlang nun, hnam zia leh sakhaw thila hma an sawnna tura politics thila hma an laknate chu zahsak turin an ngen a ni.

MBIDM-ah hian president chu GB Herbert Reang a ni a, general secretary chu Philip Apeto a ni.