Thapui thawha ruihhlo do a ṭul - Health Minister

Health minister Lal Thanzara chuan, ruihhlo chhuak thar a awm zel thu sawiin, "Damdawi hlauhawm leh ṭhalaite mit la tak ruhhlo a chhuak thar zelte a, sorkar, kohhran leh tlawmngaipawlte'n tha­pui thawha ruihhlo do chhunzawm zel a ṭul," a ti.

Cheng nuai 475.28 sênga sak Chanmari West community hall thar nimina a hawnnaah thu sawiin Lal Thanzara chuan, "Ruihhlo hi YMA leh NGO hrang hrangte'n nasa taka kan do mek chungin, min chên chilh reng tho a, kan ṭhalaipui tam tak kan chán tawh a, a buaipuitu pawh kan ṭhalaite aṭangin an la awm reng tho," a ti a; Mizoram chu ruihhlo luhka leh a chhuahka nih thu a sawi.

Lal Thanzara chuan, sorkarin ṭhalaite khawvel thar siam a tiam chu a taka kalpui zel a ni tih sawiin, "Mizoram hmun hrang hrangah sport infrastructure ṭha din a ni tawh a, ṭhalai sang tam takin an chhawr ṭangkai mai ni loin, football-ah phei chuan eizawnna tling khawpin kan ṭhalaite'n hma an sawn a ni," a ti a; infiamna ruhrel ṭha sorkarin a buatsaihte chu ṭhalai tam zawk tan chona ni se a duh thu a sawi.

Chanmari West co­mmunity hall hi January 17, 2017-ah sak ṭan a ni a, August 2018-ah sak zawh a ni.