Zoramin kalphung ṭha a mamawh - Upa C Ngurthantluanga

Ṭangrual pawl, Zoram Peoples' Movement (ZPM) chuan nimin khan an pisa-ah chhung inkhawm an hmang a, hunserh hmangtu Upa C Ngurthantluanga chuan Mizoram kalphung ṭha a mamawh thu a sawi.

C Ngurthantluanga chuan Mizoramin mi ṭha a mamawh rualin, kalphung ṭha a mamawh tih sawiin, "Tu pawhin ram rorelna chelh se, thil dik lo tih tumte lo dang thei tur kalphung thar kan mamawh. Chutiang tur chuan ZPM hi kan beisei che u. Kan ram hruaitute hi ka ngaisang ṭhin, Pathian thu sawi tur pawh an ngah. Ka rualawh ṭhinna erawh chu Pathian thu zawm tel a ni. Kan ram leh hnam damna chu Chanchin Ṭha hi a ni," a ti.

C Ngurthantluanga chuan, Mizo hnam hmelma chu ram páwna mite loin, a chhunga chengte zinga mi nia a hriat thu sawiin "Kan hnam damna tur leh kan inpho chhuahna atan hian tuifinriat râla mi kan mamawh lo. Kan ram siamṭhatu tur chu a chhungah hian kan awm. Kum 30/40 state kan nih chhunga min ei chhetute hi foreigner an niin ka hre lo. Ho tê, tih theih mai tih loh avang a ni," a ti a; Mizoram, Mizo hnam leh kohhran a tlûkchhiat lohna atan dai theu tur ramin a mamawh thu a sawi. Thusawitu dang, ZPM chief ministerial candi­date Lalduhoma chuan, September 2018 chhungin Vairengte-ah hnam dang mi 10,384 hnenah Inner Line Permit (ILP) pek chhuah a nih thu a sawi a, "Mizo mipuite hi sorkar kutah kan him tawh lo," a ti.

Lalduhoma chuan kumin Sept. 2018 chhung ringawtin Vairengte Police checkgate aṭangin chhinchhiah theih chinah hnam dang mi 10,384 hnenah ILP pek chhuah an nih thu sawiin, "Assam sorkarin an khua leh tui dik tak hriat chianna, National Register of Citizens (NRC) a kalpui avangin hnam dang kan ramah an lo lut mek a, MZP-in kan sorkar auh harh a tum a, sorkar a muhil der tlat a ni," a ti a; sorkar kutah Mizo mipuite an him tawh lo a, mutthilhpui mai chi a nih loh thu a sawi.