MPC MLA-in Hnam Rûnah thu a sawi MNF an sorkar ka ring - MLA Thanliana

MPC party aṭanga MLA awmchhun Lal­thanliana, Aizawl North-II bialtu chuan nimin khan MNF party pisa, Mizo Hnam Runa inkhawmah thu sawiin, kumina Ass­em­bly inthlanah MNF an chak ngei a rin thu a sawi a, "He hmunah hian thu tam zawk ka la sawi turah ka ngai," a ti.

Lalthanliana chuan, MNF MLA-te nen inpawh takin hma an laho ṭhin tih sawiin, "Min thlang tlingtu mipui tam zawk chu MNF in nih tho avangin inthlahrung lo leh tlángnêl takin Hnam Rûnah thu ka rawn sawi a ni. MNF lamin min en hrang lo hle a, politics ka zin kawngah khawhar taka awm cháng ka ngah hle ṭhin a, MNF MLA pangate hian min en hrang miah loin min kuah ṭhin a ni," a ti a; MNF MLA-te chungah a lawm thu a sawi.

Pathianin rem a tih chuan Mizo Hnam Rûnah thu tam zawk a la sawi tura a ngaih thu sawiin Lalthanliana chuan, "Tunah chuan thu tam tak sawi tur ka neihte pawh ka la khêk a ngai rih a ni. Inthlan dawn apiang hian tute nge sorkar tur tih hi ka ring sual ngai lo a, 2018 inthlan lo awm turah hian MNF a sorkar ngei ka ring," a ti.

Inkhawmah hian MNF president Zoramthanga pawhin thu a sawi a; in­thlan a hnaih tawh avangin Congress sorkarin sorkar hnathawkte chu an hna pangngai pawh ni lo thawhtir an tum nia a lan thu sawiin, "Sorkar hnathawkte hian an hna pangngai ṭha takin thawk mai se. Hlauhthawnna nei hauh loin thlamuang takin lo thawk rawh se; an thil tihah erawh chuan fimkhur takin lo ti sela, lo inham hnawk buai suh se," a ti.

MNF President chuan, "Inthlan hun puan a rei tawh lo turah kan ngai a, hun chêp tak an neih hi ṭangkai taka hman tumin Congress sorkar hian hma a la mek a, contract hna leh thil dang dangah a biling a balangin an ti rum rum a ni," a ti a; Congress sorkar chu tla tawh mai tur chêtin an che vel mek niin a sawi.

MLA Lalthanliana hi kum 2013 inthlanah MPC leh MNF thawhhona hnuaia Aizawl North-II bial aṭangin thlan tlin a ni a, MNF MLA pangate nen Mizoram Democratic Alliance (MDA) angin Assembly House-ah an awm. A awmna party MPC chu tunah chuan pawl hrang hrangte nen ZPM-ah an thawkho tawh a; ZPM hian Aizawl North-II bialah mi dang candidate-a dah an tum nia sawi a nih avangin Lalthanliana hian MNF zawm a tuma sawi a ni. MNF hotute pawhin, amah zuitute nghah deuh an la ngaih avangin Mizo Hnam Runah an la lawm lut rih lo niin an sawi.