Voluntary Blood Donation Day hman a ni

Nimin October 1 kha National Voluntary Blood Donation Day a ni a, Mizoram State AIDS Control Society (MSACS), Association for Voluntary Blood Donation leh blood bank-te huaihawtin Mizoram hmun hrang hrangah hman niin, thisen pek rûnpui buatsaihah thisen unit 368 pek a ni.

National Voluntary Blood Donation Day hi Aizawlah chuan Hrangbana College Golden Hall-ah hman a ni a, National Health Mission (NHM) director Dr Lalrozama khuallian a ni.

Dr Lalrozama chuan, kumina Day thupui, 'Hlimna hi thisen pek aṭangin a awm' (Happiness is donating blood) tih chu thu dik a nih thu sawiin, "Thisen pe tur hian invawn thianghlim tlat a ngai a, ruihhlo leh mipat hmeichhiatna hmansual laka fihlim turin ṭhian ṭha lo kalsan an ngai ṭhin a, tih leh tih loh tur chin ramri fel tak insiam hi himna pawimawh a ni," a ti a; voluntary blood donation-ah Mizoram chu 100% a nih theih nan ṭan lak zel a ngaih thu a sawi.

Inkhawm kaihruaitu, MSACS project director Dr Lalmalsawmi Sailo chuan, "Tunah chuan thisen thianghlim pek a ngai tia kan sawi a ṭul tawh. Thisen thianghlim pe tlaka invawn thianghlim leh HIV darh zel ven hi ṭhalaite'n kan mawhphurna a ni tih kan hriat chian a pawimawh," a ti.

AVBD president C Lalnunnema chuan, pawl hminga thisen pek (donation camp) ngaih pawimawh zel a ṭul rualin, mimala ṭhahnemngaihna neia blood bank-a thisen pek a pawimawh thu a sawi a, "Regular blood donor kan pun zel a ngai. Tun hnaiah hmeichhia thisen pe an pung a, Mizorama voluntary donation zinga 30% dáwn chu hmeichhia an ni," a ti a, national level-ah chuan 5% vel chauh a nih thu a sawi.

National Voluntary Blood Dona­tion Day hawnna inkhawm zawhah Aizawl Civil Hospital Blood Bank leh Hrangbana College NSS bultumin zirlaite'n thisen an pe nghal a; thisen unit 200 pein, a petute mipa 134 leh hmeichhia 66 an ni. District khawpui dangahte pawh hman a ni a, thisen pek rûnpui an huaihawt nghal bawk.

Lungleiah chuan AVBD leh Lunglei Civil Hospital blood bank huaihawtin Lunglei College-ah hman a ni a, college zirlai mipa 51 leh hmeichhia 36-te'n thisen unit 87 an pe. Siahaah chuan ECM HSS-ah hman a ni a, zirlai mipa 24 leh hmeichhia pathumte'n Siaha District Hospital tan thisen unit 27 an pe. Kolasib-ah chuan District Hospital Blood Bank-ah hman a ni a, CZ Higher Secondary School NSS-te'n thisen unit 54 an pe a, a petute mipa 26 leh hmeichhia 28 an ni.

AVBD general secretary Lalrin­kima tarlan danin, sorkar kum hmasa 2017-18 chhung khan Mizoram pumah thisen unit 26,248 pek a ni a, chu'ng zinga unit 21,880 (83.36%) chu pek bik nei loa a thlawna pek a ni. Voluntary donation zinga unit 15,601 (59.44%) chu páwl hmingin, unit 6,279 (23.92%) chu individual voluntary donation a ni thung.

Sorkar kum kal mekah thla nga (April-August 2018) chhungin thisen unit 11,461 pek a ni tawh a, chu'ng zinga unit 9,532 (83.20%) chu voluntary donation a ni a; blood dona­tion camp ṭum 183 neih a ni tawh.

India Society of Blood Transfusion and Immuno haematology bultumin October 1, 1975 khan All India Volun­tary Blood Donation Day hman a ni a, chuta ṭang chuan October 1 apiangin National Voluntary Blood Donation Day hman a ni. Kum 1996 aṭangin NACO hriatpuiin hman ṭan a ni a, Mizoramah chuan kum 1999-ah hman ṭan a ni.