KHAWTHLIR

Wildlife Week
Environment Forest & Climate Change, Mamit Forest Division bultumin khan nimin khan Mamit IPR conference hall-ah National Wildlife Week vawi 64-na lawmna buatsaih a ni a, Inter School Quiz Competition buatsaih a ni bawk. Week thupui atan 'Big cats - predators under threat' tih an hmang a; quiz intihsiaknaah hian St. Francis of Assisi School, Team B chu pakhatna an ni.

Polling Station
Mamit DC Vanlalngaihsak hoin nimin khan a pisaah Mamit District Level Standing Committee on Election an ṭhukhawm a, an district chhunga polling station 116-ah Assured Minimum Facilities (AMF) a awm theih nana hmalak dan tur sawiho a ni. Polling Station-a power supply a khaihlak loh nana hma la turin Power & Electricty department ruat an ni a, tui connection leh inthiarna chungchang chu PHE department ruat an ni bawk.

Lungphùm phúm
Mizoram Institute of Medical Education & Research (MIMER)-a New Academic Block, director quarters leh mipa leh hmeichhia hostel thar sakna tur lungphùm chu nimin khan Health minister Lal Thanzara'n a phúm. Minister chuan, building-te hi zirna kawnga Mizoram hmel lanna tur pawimawh tak a nih dawn avangin a satute'n an uluk a ṭul thu a sawi. Director quarters hi kum khat chhunga sak zawh tur a ni a, hostel chu kum hnih chhunga sak zawh tur a ni.

Tlan phal lo
Traffic SP chuan thupek chhuahin, PWD-te'n Salem Veng aṭanga Venghnuai chhohna, Kulikawn Presbyterian biak-in bul leh Damveng panna kawng siamṭhat hna vawiin aṭanga an thawh ṭan avangin, hna thawh zawh a nih hma chu he kawngah hian lirthei tlan phal a ni lo tih a tarlang.

MPSC result
MPSC chuan Mizoram Civil Services (Combined Competitive) Preliminary Examinations 2018 result chu nimin khan a tichhuak a, Mains Examination hmachhawn thei turin candidate 2,241 zinga mi 150 an tling. Tun ṭumah hian MCS post 15 hnawhkhat tur lak a ni dawn a, Main exam chu November 5-9, 2018 chhungin neih a ni ang.