CM-in NLUP hnuaia scheme thar a hawng

NLUP hnuaia hmalakna thar, 'Rain Garden & Mei Sipai Scheme' leh 'Chief Minister's Special Package (Medical Care)' chu nimin khan chief minister Lal Thanhawla'n Lal Thanhawla Auditorium-ah a tlangzarh.

Scheme thar hawnna inkhawm hi NLUP Implementing Board (NIB) chairman JH Roṭhuama'n a kaihruai a; Chief Minister chuan, "NLUP hnuaiah tunlaia ramin a mamawh - inenkawlna lama chhawmdawlna 'medical care' mi harsa zualte tana buatsaih a ni leh ramngaw leh nungcha humhalh kawnga hmalakna thar NLUP kaltlanga siam a ni hi a lawmawh hle. Kum tina India rama kângmei chhuah tamna ber zinga mi kan ni hi a zahthlak a, kângmei venn kawngah mi tin kan ṭan tlan a ngai," a ti.

CM's Medical Care Scheme kalpui­na atan hian damdawi-in 16 - Aizawl Civil Hospital, Medical College Hospital (Referral Hospital), district hospital pariat, Cancer Hospital, Synod Hospital, Aizawl Adventist Hospital, Christian Hospital, Lairam Christian Medical Centre & Hospital leh Christian Hospital (Lawngtlai)-te thlan a ni.

CM Special Scheme-a sum hman tur hi damdawi-in tina medical superintendent-te account-ah dah luh a ni dawn a, medical superintendent chuan CM Special Scheme Management Committee dinin, sum chu beneficiary-te tan an hmang dawn a ni. Committee hian beneficiary an thlang ang a, a ṭul ang leh an mamawh angin ṭanpuina sum pek tur zat an tûk ang. Ṭanpuina dawngtute list leh an dawn zat ṭha takin an vawng ang a, a ṭul ang zela audit theih turin an buatsaih tur a ni.

Sum kal vel dan an endik ang a, mamawh dan ang zelin dil belhna (demand)-te NIB-ah an thlen ṭhin dawn. Ṭum khata mi pakhata sum pek theih tam ber (upper limit) chu Rs. 20,000 a ni dawn a, chu aia tam mi pakhat tana hman a ṭul chuan a enkawltu doctor emaw, ward sister emaw lehkha (MS hriatpuina) nen NIB Chairman phalna lak a ngai.

Rain Garden leh Mei Sipai scheme-te hi NLUP thil tum - ram leilung hman dan tur rua­hmanna thar leh ramngaw siamṭhatna atana duan a ni. Scheme hnuaiah hian tuikhur tui leh lui tui tihnun thar lehna atan lui hnár leh tuikhur hnár ‘catchment area' sq. km. 2,100 vel a bika humhalh turin ramngaw reserve nghet siam tum a ni a; vantlang ram - mimal leh pawlte'n mahni duhthua khawih chhiat leh tihdanglam theih loh turin khaw tinah committee siam tur a ni.