ZPM leh PRISM-in thawhho dan an zawng

Zoram Peoples' Movement (ZPM) hruaitute leh Peoples Representation for Identity and Status of Mizora (PRISM) party hruaitute chu nimin khan Aijal Club-ah an inkâwm a, MLA inthlan lo awm tura thawhho dan tur an sawiho.

Inkawmhona kaihruaitu ZPM leader K Sapdanga chuan, Mizoram mipuiin sorkar hmel thar an hmuh duh êm avangin ZPM leh PRISM chu inthlan hunah ṭangho se tih rawtna leh nawrna a tam thu a sawi a, "He rawtna hi engtia chhan tur nge tih sawiho ṭula hriatna vanga inhmuhkhawmna hun buatsaih kan ni," a ti.

PRISM president Vanlalruata chuan, Assembly bial 10-ah candidate an puan tawh thu leh bial 31-ah candidate siam an tum thu sawiin, "Tun karah bial dang candidate puan theih kan beisei. Chutih laiin, mipui nawrna zahawm kan tih avangin PRISM chuan thawhho dan kawng dap chhunzawm an duh ka ring," a ti a; PRISM chu party a nih avangin symbol kalsan loa thawhho an duh a rin thu a sawi.

ZPM senior vice chairman Dr Kenneth Chawngliana chuan, mipui nawrna nasa tak avangin thawhho thei ṭhaa a rin thu sawiin, "PRISM hian an symbol kalsan a, ZPM an lo zawm theih ve mai kan beisei. ZPM hian bial 39-ah candidate kan dah ka ring a, mipui nawrna avang erawh chuan PRISM nena thawhho dan kawng dap chu ZPM hruaitute duh dan a nih ka ring," a ti.

Inkawmnaah hian ZPM senior vice chairman Vanlalhlana leh PRISM general secretary Lalrinzuala Chawngthu te pawh an tel a; tun kar chhunga inkawm leh an tum a ni.