Tun hnaiah Meth mûm 9,48,000 man

Mizoram Police-te chuan tun hnai khan Mizoram chhunga hmun pahnih­ah Methamphe­tamine (Meth) mûm 9,48,000 an man a, a vaiin cheng vbc. 19 vel hû a ni.

Nimina Police thu­chhuah tarlan danin, Aizawl SP hnuaia District Special Branch (DSB) chuan September 28, Zirtawpni zan dar 8:30 vel khan Ṭhuampuia Zuangtui panna kawngah Meth mum 1,00,000 (kg. 10.9) an man a, tualchhung­a hralhna ang chuan cheng nuai 200 vel hû a ni. Bawngkawn Police Station-ah NDPS Act tlawhchhanin thubuai an ziak lut.

Champhai Police-te pawhin 10th. Assam Rifles nen ṭang rualin September 17, 2018 zan khan Dungtlangah motor pahnih aṭangin Meth mûm 8,48,000 (kg. 105) leh a neitua puh Myanmar lam mi pahnih an man. Hemi zana Meth an man hi cheng nuai 1700 vel hû a ni.

Aizawl DSB-te chuan September 25-29 chhung­a ruihhlo vâi beihpui (operation) an thlaknaah rakzu litre 564.5 an man a; dan loa zawrh sapzu ûm 67, beer can 56 leh heroin can 7 an man bawk. Chu'ngte chu Rs. 1,68,100 vel man a ni.

Mizoram Police thuchhuah chuan, Meth chu a hlauhawm hle tih sawiin, "Rang taka nun tichhia a, thihna thlen theitu a ni. He ruihhlo hi miin a tih chhin tawh chuan rei lo têah a ngawl a vei ṭhin a, damdawi dang­te ang lo takin a tihdamna (antidode) emaw, a enkawlna, substitute hmanga zawi zawia tihrehna (rehabilitation process) a buaithlakin a theih loh tluk a ni. Ṭhalai, naupangte'n an tih lohna turin nasa taka ṭan rual a pawimawh," an ti.

Ruihhlo - zu leh drug-te chu ṭhalaite nun ti­chhetu leh suattu an nih avangin Mizoram Police chuan an do zel dawn tih sawiin Police thu­chhuah chuan, khaw­tlang mipui leh sorkar department zawng zawngte thawhpuiah an sáwm a ni.