Tuivawla MNF candidate tur Lalchhandama Ralte

MNF treasurer Vanlal­zawma chuan nimin khan Darlawn Bazarah Tui­vawl biala MNF campaign kick-off hun a hmang a; Tuivawl constituency-ah hian MNF candidate tur chu MNG general secretary Lal­chhandama Ralte, MLA hlui a nih thu a puang.

Vanlalzawma chuan, MNF an sorkar chuan ṭhalaite hnathawh tur ngaih pawimawh hmasak a ni dawn tih a sawi a; Tuivawl MLA ni mekin kum 10 chhungin theih­tawp a chhuah tih a hriat thu leh amah chu ṭha lo an tih loh thu sawiin, "Tun ṭum chu mipuite'n ko i thlak ve tawh ang u, tiin kan sawm che u a ni," a ti.

Lalchhandama Ralte pawhin thu sawiin, MNF hotute'n Tuivawl bial MNF candidate tura an ruat chu lawm taka a pawm thu a sawi a, "He biala ding tur hian chhuan tur chakna ka nei lo, Pa­thian chaknaah ka innghat a ni," tiin, Tuivawl biala khaw 24-te chu a khuate vek an nih thu a sawi.