Mizoramah Faina Hapta ṭan a ni ; Mizorama khawpui fai ber Biate

Nimin zing khan Aizawl leh district hrang hrangah Faina Hapta (Cleanliness Week) hman ṭan a ni a, Aizawlah chuan Vanapa Hall-ah hawn a ni. Khawpui fai inelna result puan a ni a, Biate chu khaw fai berah thlan niin, district khawpui zingah Lunglei chu a fai ber thung.

Urban Development & Poverty Alleviation (UDPA) department huaihawt Faina Hapta hawnnaah hian Planning minister Lalsawta khuallian a ni a; NEDP component pakhat - Climate Change, Cleanliness and Sanitation Drive hnuaia hmalakna - faina kawnga Mizoram khawpui (census town) 23-te intihsiakna result puan niin, category pahniha pakhatna aṭanga pathumnate hnenah lawman hlan a ni.

Lalsawta chuan, faina kawngah Mizo mipui an harh tih sawiin, "Faina leh hriselnate hi thil inzawm tlat, faina leh hmasawnna pawh thil inkungkaih tlat a ni," a ti a; khaw fai bera thlante chuan an dinhmun hmun ngai neih reng tum se a duh thu leh, khaw fai ber zinga lang pha lote pawhin fai ber nih tum se a duh thu a sawi.

Planning Minister chuan, fai leh balh chu rilru lam aṭanga inṭan a nih thu sawiin, "Fai leh balh thu hi kan ban phak ve ve a awm, duh thlannaa innghat a ni. Duh thlanna thiang hmangin faina chu mi tinin kan thlan zawk a ngai. Tibawlhhlawh lo zawnga hmalak hi tifai zawnga hmalak tluk zeta pawimawh a ni," a ti.

Cleanliness Week hi Mizoramah kum 1977-ah hman ṭan a ni a, kuminah pawh census town zawng zawngah kar tluana han a ni dawn. Census town-te bakah, thingtlang khaw dang leh khawpuia veng malte pawhin an remchan angin an hmang dawn a; niminah pawh khan khua/veng eng emaw zatin khawlai leh thlanmual tihfai hnatlangte an nei a ni.

NEDP hmalakna - Climate Change, Cleanliness and Sanitation Drive hnuaiah hian Mizoram Sanitation Task Force din niin, district tinah District Sanitation Task Force leh khawpui tinah Town Sanitation Task Force din a ni a; khawpui fai inelna chu July 16, 2018-ah UDPA minister Zodintluanga'n a hawng.

Khawpui fai inelnaah hian category pahnih siam a ni a; category I-ah district headquarters-te awmin, category II-ah district khawpui ni lo census town dang 15 an awm thung.

Endiktu atan panel of expert din ni a, September 2018 chhung khan khawpui 23-te chu an endik. Endikna tlangpuite chu - bawlhhlawh thliar hrane, bawlhhlawh hman nawn (waste re-use), pawn lama inthiar awm leh awm loh dinhmun (open defecation free status), mipui inrawlh dan (citizen participation) leh vantlang nun (public awareness)-te a ni.

Category I leh II khaikhawmin khawpui fai ber chu Biate a ni a, Zawlnuam chu pahnihna niin, pathumna chu Lunglei a ni.

Category-I district khawpuite zingah Lunglei a fai ber a, pahnihna chu Serchhip niin, pathumna chu Mamit a ni.

Category-II census town dang 15 zingah Biate pakhatna a ni a; Zawlnuam chu pahnihna niin, Lengpui chu pathumna a ni.

Khawpui fai inelna chungchang hi PHE superintending engineer Lalrothanga'n a sawifiah a; category I leh II-a pakhatnate'n Rs. 1,00,000 an dawng a; pahnihnate'n Rs. 70,000 leh pathumate'n Rs. 50,000 an dawng thung.