ZPM-in chaw ngheia ṭawngṭai hun an hmang

Ṭangrual pawl, Zoram Peoples' Movement (ZPM) chuan nimin khan Aizawla an pisaah 'Zoram politcs-ah Pathian ram lo thleng rawh se’ tih thupui hmangin chaw ngheia ṭawngṭai beihpui thlakna inkhawm an buatsaih a, mi ṭhahnem tak an tel.

ZPM pisaa Zoram tana chaw ngheia ṭawngṭai beihpui hi zing dar 7 aṭanga chawhnu dar 2 thleng neih a ni a; kohhran pawl hrang hranga rawngbawltu pawimawh - CHAN director Maj. Liankunga, Faith Ministry speaker T Lalhmachhuani, C Lalrosanga leh Koinonia Ministry speaker Vanlalliana ten hun an hmang a ni.

ZPM Steering Committee chairman Lalliansawta chuan, Mizoram inthlanpui a hnai ta hle tih sawiin, inthlan lo awm turah hian Mizoram mipuite chu ngaihtuahna fím tak hmang ṭheuh turin a chah a, "Tuna politics kan kalpui danah hi chuan kohhran rawngbawltu leh khawtlang hruaitute tel vena tlak loah politics kan siam ta ringawt mai hi ṭha lo kan ti a, kohhran hruaitute telna tlaka kan siam a ngai a ni," a ti.

Lalliansawta chuan, Mizoram union territory a nih aṭanga kum 45 a liam tawh hnu leh state a nih aṭanga kum 30 a liam hnuah pawh kawlphetha siam chhuah a la awm mumal loh thu leh kawngpuite chu a ṭhat hman mang loh thu a sawi a; khawtlang nunah leh ram inrêlbâwlnaah Pathian ram a thlen a pawimawh thu sawiin, Mizoram rorelna siamṭha a, kalphung thara sorkar siam a nih theih nan ZPM thawhpui turin Mizoram mipui a sáwm a ni.

ZPM coordinator F Rodingliana chuan, kalphung thara Mizoram kaihruai turin kohhran leh politics a kal kawp a ṭul tih sawiin, "Kan politics-ah Pathian mi kan dah pawimawh a ngai a, hei hi chung lam malsawmna kan dawnna tur a ni," a ti. ZPM hmalakna chu Pathianin nasa takin mal a sàwm thu leh kohhran upate'n an tuipui nasat thu sawiin, "ZPM local steering committee-a office bearer-ah kohhran upa 100 chuang an awm tawh a ni," a ti.

ZPM Coordinator chuan, Assembly inthlana ZPM candidate turte pualin gospel camping buatsaih an tum thu a sawi bawk.

Nimina ZPM-in chaw ngheia ṭawngṭaina an buatsaihah hian - Mizoram politics-ah Pathian ram a thlen theih nan te, sorkar ṭha a din theih nan te, mipuite'n huaisen taka an duh zawng an thlan theih nan te, ram hmangaihna tel lo leh rosum ûma rorelna chelh tum an awm loh nan te, thlei bik nei lo roreltu thlan chhuah a nih theih nan te, kalphung thara rorelna kalpui a nih theih nante an ṭawngṭaiho a ni.