Joint NGO-in inremna anga kal an duh ; Bru raltlante hruai kîr an remti tawh lo

NGO Coordination Committee (Joint NGO) chuan nimin khan thuchhuah siamin, Minis­try of Home Affairs (MHA), Mizoram sorkar, Tripura sorkar leh Mizoram Bru Displaced People Forum (MBDPF)-te'n kumin July thla tìra Tripura relief camp-a Bru-te chungchanga inremna an siam chu kaltlangpui an duh thu leh, tunah chuan Mizorama lêt duh pawh awm se, an remtih tawh loh thu an tarlang.

Joint NGO chuan, "Mahni duhthu ngeia Mizoram aṭanga chhuak Tuikuk, Tripura camp-a awmte Mizorama an lo lêt leh theihna tura MHA, Mizoram leh Tripura sorkar leh MBDPF-ten July 3, 2018-a inremna an neih angin, lo lêt theihna hun hnuhnung ber September 30 chu a zo ta a. Hun tiam chhung hian chhungkaw eng emaw zat chu an lo let tawh a, hun tiam a ral hnu hi chuan lo let duh pawh awm leh mah se, NGO Coordination Committee chuan remti tawh lo a, inremna ang hian kaltlangpui ni se a ti a ni," an ti.

Joint NGO chuan, Mizorama let tura hun hawn chhunga luhlul chhuaha lêt duh lote chu Mizoram sorkarin ziaka thu a lo tiam tawh angin, Mizoram Electoral Roll aṭanga paih an nih theih nan hma la nghal turin Mizoram sorkar an beisei thu an tarlang a (Vide no. 32020/19/2012-HM Govt. of Mizoram, Home Department Dated Aizawl the 8th April, 2014).

NGO Coordination Committee chuan, kum 22 chhungin ṭum riat lai sorkarin Mizoram Bru-te hruai lêt a tum thu sawiin, "Chumi chhunga Tuikuk lo let duh lote chu Electoral Roll aṭanga thaibo (delete) tura hmalak a nih dawn avangin, Tuikuk vote beiseia Tripura camp-a campaign nei tawh lo turin Mizorama political party zawng zawngte kan hriattir a, NGO Coor­dination Committee duh dan hi zâwm vek turin kan ngen a ni," an ti.

Hetih lai hian, Tripura relief camp-a tun hnaia electoral roll ennawnna aṭangin Mamit district bikah chuan electoral roll-ah Bru 596 thun belh an ni. Mamit district huam chhung bika Tripura-a awm Bru thun belh zat chu - Hachhek constituency-ah thun thar dil mi 2,108 zinga mi 286 te, Dampa bialah thar dil mi 369 zinga 94 te leh, Mamit bialah thun thar dil mi 1,473 zinga 216-te an ni.