Vawiin aṭangin maxicab tlân dawn lo
Mizoram Maxicab Owners Association (MMCOA) chuan, vawiin aṭang hian tiam chin awm loin sorkar laka lungawi lohna an lantir dawn a; khualzin phur maxicab zawng zawngte an tlân dawn lo.
MMCOA hian September 27, 2018 khan press conference neiin, tiam chin awm loa tlan loh an tum thu hi an puang tawh a; chumi hnu, October 1, Thawhṭanni khan Aizawlah MMCOA general headquarters hruaitute leh district leh welfare hrang hranga office bearer-te ṭhukhawm chuan, chhan hrang hrang vânga March 3, 2018 aṭanga tiam chin awm loa tlan loh an lo rèl tawh chu kaltlangpui an remti a ni.
MMCOA hian maxicab chuan man tihsan leh all Mizoram permit tihtawp tawh pek chhuah leh an phût a; April 2018-a MMCOA Special Assembly-in a rel angin, maxicab chuan man chu km. khatah metal road-ah Rs. 3 leh metal loh kawngah Rs. 3.50-ah tihsan an phût a ni.
State Transport Authority (STA) rate siam anga maxicab chuan man hman mek chu km. khatah metal road-ah Rs. 2.50 leh metal lohah Rs. 2.75 a ni thung.