KHAWTHLIR

Pik-up thar pe
Aizawl North-III bialtu MLA Lal Thanzara, minister chuan nimin khan a bial chhunga Edenthar Veng khawtlang hman atan Edenthar Branch YMA hnenah pik-up motor thar a pe. Pik-up hi 4X4, cheng nuai 8 chuang man a ni a; nimin zing khan Edenthar Veng YMA Hall-ah inhlanna inkhawm neih a ni.

Rakzu man
Zawlbuk Group YMA Kumpuan volunteer-te chu nimin khan Tuikhurhlu-ah an hnatlang a, YMA branch hrang hrang hrang aṭangin mi 60 vel an thawk chhuak. Hnatlangte hian zu fun 524 bakah zu siamna hmanrua - belpui 20, bél mawng pawp 16, bêl tê 15, dawidim báwm 5, chini ip 5, plastic bûr 30 an man a; zu bilh lai zém 50 chuang an tichhe bawk.

Tuichik hawng
Champhai Bethel Venga Chhura Hmun Welfare Committee-in rs. 1,20,000 vel senga an siam, Chhurbura Siktuithiang leh Chhurbura Tuichik chu October 1, Thawhṭanni khan Champhai DRDA project director Ethel Rothangpuii'n a hawng. Chhura Hmun Welfare Committee hi August 1, 2010-ah din a ni a, chhungkaw 114 an tel a ni.

MLA-in hawng
Lunglei East bialtu MLA Joseph Lalhimpuia chuan nimin khan a bial chhung, Lunglei Electric Venga Rs. 2,00,000 senga sak 'Chhumchhe In' a hawng. Chhumchhe In hi a dung ft. 24 leh a vâng ft. 12 a ni a, mi harsa zawkte chenna tur atana ruahman niin, a sakna atan Bialtu MLA-in a fund a thawh bakah, YMA member-te'n thâ eng emaw zat an sêng a ni.

World Rabies Day
October 1, Thawhṭanni khan Lunglei Chief Medical Officer pisaah World Rabies Day hman a ni a, rabies (ui a hri) chungchang zirhona leh inven dan te, rabies chung­chang zir chianna leh hmalak dan turte sawiho a ni. Inkhawma tarlan danin, India ramah mi 20,000 vel kum tin rabies avang­in an thi ziah a, Lung­lei district-ah ­chuan ­kum 2018 chhung­in mi pahnih ui a hri vanga thia hriat a ni.