Khawpui hrang hrangah Faina Hapta hawn a ni

Nimin khan Mizoram hmun hrang hrangah Faina Hapta 2018 hawn a ni a; khawpui ṭhenkhatah chuan zirlaite leh mipuite'n khawlai thenfai hnatlang an nei nghal.

Faina Hapta hawnna inkhawm hi Siahaah chuan Bazar Traffic Point-ah neih niin, MADC executive member (LAD) MH Tiabi-a'n a hawng. Tiabi chuan, Siaha district chhunga khua, veng leh kawtthlerte a fai zawk theihna atan Mizoram sorkar leh MADC-in sum leh tha sengin hna a thawk tih sawiin, "Tlawmngai pawl hrang hrang, V/C, chhung tin leh mimal ang pawhin kan theihna zawn ṭheuhah kan bei nasa hle a ni," a ti.

Faina Hapta hawn puala inkhawm zawhah Adventist English Acedamy School zirlai naupangte'n Siaha Bazar huam chhunga kawngpui leh kawt­thlerte thenfai hna an thawk a ni.

Champhaiah chuan Faina Hapta hi CHANEM building-ah additional DC K Vanlalṭhiana'n a hawng a, Faina Hapta puala hnatlangte a vai liam.

K Vanlalṭhiana chuan, fai chu sakhuana dawta ngaih pawimawh hmasak ber tur a nih thu sawiin, Champhai district mipuite chu faina kawnga nasa zawka ṭan la thar turin a sáwm a, "Thinlung leh rilru thianghlim hmasain, páwn lam lan dan a siam chawpchilh mai ṭhin avang­in faina chu chhung lam aṭanga ṭan chi a ni," a ti.

Faina Hapta pual hian Champhaiah chuan fai inelna sorkar pisa, zirna-in, restaurant, anganwadi leh veng hrang hrang inelna buatsaih a ni dawn a; high school naupangte tan On the Spot Essay Writing Compettition leh middle school naupangte tan On the Spot Painting Compettition buatsaih a ni ang.

Lawngtlaiah chuan Faina Hapta hi Areopagy-ah LADC executive member (LAD) H Chhuanawma'n a hawng a; Chhuanawma chuan, Lawngtlai khawpui chu faina kawnga hma an sawn zel thu sawiin, mipuite chu mahni faina an buaipui mai bakah, mi dang kawhhmuhtu leh zirtirtu nih tum turin a chah.

Hapta hawnna hun hman zawhah sorkar official, tlawm­ngai pawl hrang hrang bakah, Don Bosco School leh Downtown English School naupangte khawlai dunga bawlhhlawh thianfaiin an hnatlang a ni.

Faina Hapta hi Mamitah chuan Charkawnah hawn a ni a; khuallian Vanlalngaihsaka, bawrh­sap chuan, faina leh thiang­hlimna chu hapta hman chhung ringawta buaipui tur a ni lo tih sawiin, "Kan dam chhungin kan fai reng tur a ni. Keimahni leh kan in leh lo a fai chuan kan khawtlang a fai a ni," a ti a, naupangte chu tun aṭanga faina kawnga an thanharh chuan nakin lawkah khawpui nuam tak an neih tur thu a sawi.

Mamita Faina Hapta hawnna inkhawmah hian Mamit khawpui chhunga khawtlang hruaitute leh tlawmngai pawl hrang hrang, Joint V/C, YMA sub-headquarters, MHIP sub-headquarters leh MUP sub-headquarters aiawhte'n thu an sawi a ni.